Islamabad, ïaïong
U Myntri Rangbahduh barim ka Pakistan, u Imran Khan ha ka Sngi Thohdieng u la kynnoh ba ka kurim jong u- ka Bushra Bibi, ka la shah phah bam da ki jingbam kiba la khleh bad ki sabon lane ki dawai pynkhuid paiñkhana.
Hapdeng ka jingpynsngap ia ka mat ba iadei bad ka jingdon kti bamsap jong u haduh 190 Million hapoh ka patok Adiala jong ka distrik Rawalpindi ha ka Sngi Thohdieng, u Imran Khan u la iathuh ha u nongbishar u Nasir Javed Rana ba ka kurim jong u ka la shah ai da ki jingbam kiba la khleh da ki dawai sait paiñkhana.
Kumta, u la ong ba u heh ka Shaukat Khanum Hospital- u Dr.Asim Yousaf u la ai jingmut ia u ban phah leit test ia ka Bushra Bibi sha ka Shifa International Hospital, hynrei ki bor pyniaid jong katei ka patok pat ki la pyntip ba yn lah ban leh ia katei ka test kaba donkam tang na ka Pakistan Institute of Medical Sciences (PIMS) Hospital.
Ha katei ka sngi, u Khan u la pynksan ba ka Bibi ka la ioh bam ia ka bam kaba la khleh da ki kynja dawai pynkhuid paiñkhana bad kaba la pynlong ia ka ban ioh ia ka jingshitom kpoh. Nalor nangta u la ong ruh ba lada ki bor pyniaid ne ki pulit ki leh ha katei ka rukom ia ka kurim jong u kumjuh ia ka iing ka sem jong u, na ka liang jong u hi um lah ban pdiang ia kum kitei ki jingleh buit-poh bad ki jingleh sniew jong ki pulit kiba dei khmih ia ka jaka ba la set patok ia ka kurim jong u.
