Shillong, Ïaïong 21
Hadien ka jingthep ‘vote’ kaba la long ha ka 19 tarik, ki seng saiñ pyrthei bad ki kyrtong kiba ïakhun ïa ka ilekshon sha ka Ïingdorbar Thawaiñ Lok Sabha na baroh ar tylli ki Lok Sabha konstitwensi, kata, Shillong bad Tura konstitwensi, ki la lum jingtip bad ïakheiñ ïadiah katkum ka jingpoi ki nongthep ‘vote’ na kylleng ki jaka khnang ban kheiñ antad ïa ka jingïoh ‘vote’.
Ka Shillong Parlia-mentary konstitwensi ka don 36 tylli ki MLA konstitwensi kiba heh bad ïar ha kylleng ka Rilum Khasi Jaiñtia, katba ka Tura parliamentary konstitwensi ka don 24 tylli ki MLA konstitwensi. Naduh bakut ka sngi thep ‘vote’, ki nongïalam jong ki seng saiñ pyrthei bad ki kyrtong kiba ïakhun ïa ka ilekshon, ki la lum jingtip na kylleng ban sngewthuh ïa ka jingïoh ‘vote’ na man la ki MLA konstitwensi.
Kumta ki nongïalam ki la nang kheiñ nang diah man la ka sngi bad pynshong nongrim katba nang ïoh jingtip shaphang ka jingpoi ki nongthep ‘vote’ na ki jaka thep ‘vote’.
Ki seng saiñ pyrthei bad ki kyrtong kiba la mih ban ïakhun ha kane ka ilekshon na Shillong parliamentary konstitwensi ki long u MP ba mynta Bah Vincent H Pala uba dei u kyrtong ka Congress, ka kyrtong ka National People’s Party (NPP) ka Kong Ampareen Lyngdoh, u kyrtong ka Voice of the People Party (VPP), Dr. Ricky A.J Syngkon, u kyrtong ka United Democratic Party (UDP), Bah Robertjune Kharjahrin, ki kyrtong shimet u Prof. Lakhon Kma bad u Bah Peter Shallam.
Ha Tura Parliamentary konstitwensi ki don 4 ngut ki kyrtong kiba kynthup ïa ka MP ba mynta ka Agatha K Sangma kaba dei ka kyrtong ka NPP, u kyrtong ka Congress u Saleng A Sangma, u kyrtong ka TMC u Zenith Sangma bad u kyrtong shimet u Labenn Ch Marak.
Katba ki wat jong ka jingthep ‘vote’ ki dang ïaid ha kiwei pat ki Jylla, ki paidbah ka Jylla kin hap ban ap lynga haduh 2 bnai duna, tad haduh ban da poi ka sngi ñiew ‘vote’, kata, haduh ka 4 tarik Jylliew.
Ka jingthep ‘vote’ ha ka wat bakhatduh kan long ha ka 1 tarik Jylliew.
