Shillong, Ïaïong 21 (UNI)
Ki seng saiñ pyrthei ka Jylla baroh ki la pynpaw ïa ka jingkyrmen skhem ba ki kyrtong jong ki kin poi sha ka thong naba jan baroh ki seng ki la kdew ïa ka jingkhlaiñ ka jingwan poi ki nongthep ‘vote’ kaba long kumba 70 na ka 100 bad kam ruh ïa ka jingjop.
U Myntri Rangbah ka Jylla, u Conrad Sangma, uba dei ruh u National President ka National People’s Party (NPP) u la ong, “Ka jingdon ki nongwan thep ‘vote’ ka long kumba 70 na ka 100. Ngi la trei shitom bad ngi khmih lynti na bynta ka jingbha bad sa peit ynda la mih ki risol.”
U Sangma u la ïashim bynta shit rhem ban ïalap ha kylleng ka Jylla na bynta ki kyrtong ka seng – ka Agatha Sangma, ka MP na Tura bad ka Dr. Mazel Ampareen Lyngdoh kaba aireng na Shillong Parliamentary konstitwensi.
“Wat la ngi dang ap ïa ka jingwan poi lut jong ki nongthep ‘vote’, nga kyrmen skhem ban wanphai biang. Ngi ha ka Congress ngi kyrmen skhem ban jop ha baroh 2 konstitwensi,” la ong u Bah Vincent Pala, uba kyrmen ban poi biang sha ka thong ha ka sien kaba saw.
U MLA ka Gambegre, u Saleng Sangma u ïakhun na Tura Parliamentary konstitwensi na ka Congress.
Haba pynpaw ka jingkmen halor ka jingwan poi ki nongthep ‘vote’ ha Shillong Parliamentary konstitwensi, u President ka Voice of the People Party (VPP), Bah Ardent Miller Basaïawmoit u la ong, “Ka jingwan tuid u paidbah ha ka por mynstep ba kdew ba ki briew ki la jied na bynta ka VPP bad ngi ïohi ba ki nongthep ‘vote’ ha Shillong Parliamentary konstitwensi ki kwah jingkylla.”
Ka VPP ka la pynïeng da u General Secretary ka seng, Dr. Ricky Syngkon na Shillong Parliamentary konstitwensi.
Ha kawei ka liang, u kyrtong ka Trinamool Congress (TMC) uba ïa aireng na Tura Parliamentary konstitwensi, u Zenith Sangma u la ong, “Ka ilekshon kam long kaba suk, hynrei ka TMC ka kham long hakhmat ban ïa kiwei ki seng.”
“Ki ‘vote’ ka NPP ki la phiah hapdeng ka TMC bad ka Congress naba ki paidbah ki la kwah jingkylla,” la ong u Zenith.
Ka jingthep ‘vote’ ha Meghalaya ka la long ha ka Sngi Thohdieng ha ryngkat ki 100 tylli kiwei pat ki konstitwensi Lok Sabha ha ki jylla bapher-bapher. Ka wat ba khatduh ban thep ‘vote’ kan kut ha ka 1 tarik Jylliew bad ka jingñiew ‘vote’ kan long ha ka 4 tarikJylliew.
