Khliehriat, Ïaïong 21
Ki nongshong shnong jong ka Nongsning bad Umrasong, East Jaiñtia Hills, ki la sdang ban mad ïa ka jingjynjar na ka jingtuid ka um kaba kylla rong ktieh ha ki tyllong umbam-umdih jong ki.
Kine ki artylli ki shnong ki shaniah ban ïoh umbam umdih na ka tyllong um kaba la khot ka Umdohthli bad mynta ka taïew ki la mad jingeh na ka daw ba shisien ba la hap slap ka tyllong umbam-umdih jong ki ka kylla rong saw bad kane ka buh ïa ki nongshong shnong ha ka jingeh.
U Waheh Shnong ka Nongsning, u Bah Dipsing Bareh, u la ong ba ka daw jong ka jingkylla rong jong ka umbam ka dei namar ka jingpynïeng ïa ka karkhana saiñ dewïong ne Coke Factory kaba la tip kum ka Prisidium Breeze kaba don ha khappud kine ki ar shnong ba hap hapoh ka Elaka Sutnga, East Jaiñtia Hills.
U Bah Bareh u la ong, ha kaba ïadei bad kane ka karkhana, na ka liang ka Dorbar Shnong Nongsning ka la dep ban buh ki jingujor naduh u snem 2022 sha u Deputy Commissioner ka East Jaiñtia Hills bad kiwei kiwei ki bor halor ka jingshah ktah ka umbam-umdih jong kine ar tylli ki shnong.
Lah ban pynkynmaw ba ka Meghalaya State Pollution Control Board (MSPCB) ha ka 9 tarik Rymphang 2024 ka la ai da ka shithi pan jingshai lane ka ‘show cause notice’ ïa ka karkhana Prisidium Breeze bad bthah ban pynkhuid ïa ka sawdong sawkun ka jaka pynïeng karkhana bad ban pynthikna ba ki umbam-umdih kim dei ban shah ktah.
Pynban haduh mynta kane ka karkhana ka la leh bym suitñiew ïa kane ka jingbthah ka MSPCB, la kynnoh u Waheh Shnong ka Nongsning.
Nalorkata ki nongshong shnong ka Nongsning, Umrasong ki la mih paidbah ruh ban pyrshah ïa kane ka karkhana bad ha kajuh ka por, ka MPSCB ka la jurip ïa kane ka karkhana bad la bthah ïa ka ban khang shipor.
U Bah Bareh u la ong ba kane ka um ka dei kaba jakhlia tam bad u la kyntu ïa ka sorkar ban shimkhia ban peit ïa ka jingeh ki nongshong shnong ba kin ïoh ïa ka umbam-umdih kaba khuid.
