Seoul, ïaïong:
Katkum ki khubor, la ong ba ka North Korea ka la sdang ban pynher ‘namding biang wat hapdeng ka jingiakynad jong ka Iran bad ka Israel bad kumjuh ruh hapdeng ka jingmaham jong ka South Korea bad ka United States ia katei ka ri ba ka dei ban pynduna noh ia ki kam pynher ‘namding sha ki bynta ka West Sea jong ka Korea ha ka Sngi Thohdieng.
Namar la ong ba ka North Korea ha kane ka por ka dang pynkhreh sa ia pat u ‘namding ‘Hwasal-1 Ra-3’ ba thymmai jongka hadien ba ka la ioh ban pyrshang pynher ia utei u ‘namding ‘Pyoljji-1-2’ uba thymmai duh jongka ha ka por shiteng sngi jong katei ka Sngi Thohdieng.
Kumta, la ong ba kitei ki ‘namding kiba ka North Korea ka la pyrshang ban pynher ha kane ka por ki long ki ‘namding kiba la pyndait bad shna da ki bom ‘nuclear’ kiba khlaiñ bor haduh katta bad kiba ap jingma ruh ia kito ki ri ki ban shah ther da kitei ki ‘namding ha ka North Korea lada jia ka thma ha kano- kano ka por.
La ong ba ka South Korea, ka Japan bad ka United States ki ju maham na ka por sha ka por haba ki iohi ia ka North Korea ba ka leh ia katei ka kam kaba long ruh ka jingma kaba khraw ia ki ri ba marjan badka.
Katba, na ka liang ka North Korea pat ka la kynnoh ba ka South Korea bad ka United States ha kine ki sngi ki ia trei lang ban ioh ban thombor ia ka North Korea ynda ki la dep ban pynbit- pynbiang bha ia ki jingdonkam baroh.
Kumba la ju iohi man ka por, ka North Korea ka long ka ri kaba khlaiñ bha ban pynher ‘namding bad ka ju pyrshang ban wanrah ia ki jait- pa- ki jait ki ‘namding kat nang iaid ki por, kum ka jingpynkhreh jongka ia ki thma kiba lah ban jia hadien habud ha ki por ki bym lah ban tip lypa.
