Ampati, Ïaïong 21
Ha kawei ka jingjia kaba la pynkyndit ïa baroh, ar ngut ki khynnah kynthei kiba dang hapoh 18 snem ka rta na South West Garo Hills (SWGH) ki la shah thombor bad shah leh be-ijot ha ka kynhun ki runar kaba la pynkyndit shi kat dei ïa ka Ri-lum Garo baroh kawei.
Katkum ki kaiphod na ki pulit, kitei ki ar ngut ki la leit sha ka tamasa ïew ba man u snem kaba la long ha kawei ka jaka ha ryngkat 2 ngut ki paralok jong ki. Baroh ar kynhun kiba la shah thombor kim ithuh iwei-ïa-iwei, hynrei la kynnoh ba ki la shah thombor ha kajuh ka kynhun ba suba dei ki ‘riew runar.
Katei ka jingjia ka la jia ha ka 17 tarik mynta u bnai ha ka por 9:30 mynmiet hajan ka jaka ba pynlong ïa katei ka tamasa. La ujor ïa 3 tylli ki ejahar haba ïadei bad katei ka jingjia ha thanat Ampati.
“Kine ki dei ki jingjia kiba jia la ka jong ka jong naba kitei ki 2 ngut ki khynnah kim ithuh iwei-ïa-iwei. Kawei na kitei ki 2 ngut ka la leit bad uwei u paralok jong ka (ba hapoh 18 snem ka rta), kham pajih na katei ka tamasa ïew (300 mitar na katei ka ïew) hajan ki pynthor kba. Imat ki runar ki la ap thap lypa bad kynrup mar-mar ïa ki,” la ong u SP ka SWGH, u Vikas Yadav.
Ynda ki la ïoh bat ïa kitei ki ar ngut, u shynrang u la shah shoh ha ban da jem jai haduh ba um tip briew shuh. Hadien kane, ki la shoh sa ïa ka kynthei bad ma ka ruh kam shym la tip briew shuh, bad ka la shah thombor ha ki runar. Namar ka jingbym tip briew shuh, kam shym la tip katno ngut na kitei ki runar ki don.
Ha kawei ka liang, sa kawei pat ka khynnah kaba dang hapoh 18 snem ka rta lem bad u paralok jong ka (ba dang hapoh 18 snem ka rta) ki la leit shajan katei kajuh ka jaka ha kaba katei kajuh ka kynhun ka la ap kmang ïa ki.
“I kumba ki la ap lypa ban leh ïa ka kam be-aiñ. Ka lah ban dei na bynta ban lute ne ban leh ïa ka kam sang, hynrei ki la sngewthuh bad shim kabu ïa ka jingdum jong ka miet bad ka jinglong-jingman,” la ong u SP.
Ha ka jingjia kaba ar, u shynrang (ba dang hapoh 18 snem ka rta) uba la don lang bad ka kynthei u la shah teh ha shuwa ban shah shoh katba ka kynthei ruh ka la shah ktah kti. Hynrei kane ka khynnah ka la tip briew bad kynmaw ïa ki runar kiba la shim kabu ïa ka, iwei hadien iwei.
“Hadien ba ki runar ki la phet na katei ka jaka, ka kynhun banyngkong ka la tip briew bad namar ka jingkulmar jingmut halor kaei kaba la jia, ki la ïarap iwei-ïa-iwei bad leit phai sha la ïing. Dei ha ka sngi kaba bud (18 tarik), ha kaba la pynngat ïa 3 tylli ki mukotduma. Ki runar katkum ka jingïathuh ki lanot ki dei kiba kren Bengali. Ka jingtohkit halor katei ka jingjia ka dang ïaid bad ngi kyrmen skhem ban lap ksai,” la ong u Yadav.
Ka jaka ha kaba katei ka jingjia ka la jia ka ïajan bha bad ka khappud Assam, bad la suba ba kitei kiba donkti ki lah dei na katei ka Jylla.
“Ngin ym shu tharai, hynrei ngi kyrmen ba ngin sa lap ksai ha kine ki 2-3 sngi. Ngi shimkhia halor kaei kaba la jia bad kumta ngi pynleit jingmut bad khmih bniah bha,” la ong u SP.
