New Delhi, Ïaïong 22
U Mukesh Dalal uba dei u kyrtong ka BJP u la shah jied lypa kum u MP khlem da don ka jingïa-khun napoh ka Surat Lok Sabha Constituency hadien ba baroh kiwei pat ki kyrtong kiba la mih sha-khmat ki la weng kyrteng noh na ka jingïakhun.
Kane ka jingweng kyrteng jong kiwei pat ki kyrtong ka la long ha ka Lah Sngi U Blei kaba dei ruh ka sngi khatduh ban weng kyrteng (withdraw). Kane ka la wan ruh hadien ba ïa ki kot ki sla thep kyrteng jong u kyrtong ka Congress na Surat la pynduh pyndam noh da u Returning Officer halor ka jingkynnoh ba don ki jingbym biang bad duna, bad na liang ka Congress ka la kynnoh ba ka dei ka jingleh shiliang khmat ne ka jingïapynbeit lypa.
Ha ka rynsan social media, ka microblogging website X, u CR Paatil uba dei u nongïalam BJP ha Gujarat u la thoh, “Ka Surat ka la sei bad ai sngewbha ïa u syntiew ‘Lotus’ ba nyngkong na ka bynta u Myntri Rangbahduh u Narendra Modi. Nga ai khublei ïa u kyrtong jong ngi na Surat Lok Sabha u Mukesh Dalal uba la shah jied khlem don jingïakhun,” la ong u Paatil ha ka rynsan microblogging website X, da kaba kdew ruh sha ka shap jong ka BJP.
Haduh phra ngut ki kyrtong, kata hynñiew ngut ki kyrtong khlem seng bad uwei pat u Pyarelal Bharti jong ka Bahujan Samaj Party (BSP) ki la weng noh ïa ka kyrteng na ka jingïakhun. Katba ki kot ki sla thep kyrteng jong u kyrtong ka Congress na Surat u Nilesh Kumbhani ki la shah kyntait noh ha ka Sngi U Blei hadien ba u District Returning Officer u Saurabh Parghi u la lap ïa ki jingduna ha kaba ïadei bad ki jingsoi jong ki nongtyrwa (proposer).
Kumjuh ruh ka form thep kyrteng jong u Suresh Padsala, u kyrtong ba la pynap lypa da ka Congress na Surat, ruh la lap ba kam biang satia bad don ki jingduna.
U Returning Officer u la ong ba ki saw tylli ki kot thep kyrteng ba la aiti da ki ar ngut ki kyrtong ka Congress kim shym la long satia kiba biang. Ki nongtyrwa ha ki affidavits ki jong ki, ki la ong ba kim shym la soi satia ha ki form da maki, la ong u Returning Officer ha ka hukum kaba u la pynmih.
Na ka liang u Muktiar ka Congress u Babu Mangukiya u la ong ba ka seng kan sa ïaid shakhmat ban ujor sha ka ïingbishar high court bad ruh sha Supreme Court.
U nongïalam ka Congress u Jairam Ramesh ha ka jingthoh ba u la buh ha ka X, u la ong ba ka jingjia ha Surat ka kdew bad pyni ba ka jingsynshar laitluid ka la don hapoh ka jingma. “Ka ilekshong jong ngi, ka synshar paidbah jong ngi, ka riti synshar ba la pynbit pynbiang da u Babasaheb Ambedkar baroh mynta ki la don hapoh ka jingma. Kane ka dei ka ilekshon kaba donkam tam ha ka jingim ka jong ngi,” la ong u Ramesh.
