Bengaluru, ïaïong:
Ki bor ba dei khmih ha ka nongbah Bengaluru, ki la nang bteng ban wanrah ïa ki lad ki lynti kumno ban lah tehlakam halor ka jingpynlehnohei ïa ka umbam-umdih khamtam ha kane ka por ba ka dang ïakynduh jingeh na ka jingkyrduh um. Dang shen ka la don ka jingpyntreikam da kaba daiñ kuna ` 5,000 ïa kino kino ki nongshong shnong halor ka jingpyndonkam bakla ïa ka um ha kum kane ka por ba kyrduh um ha ka nongbah.
Nalor kane la thmu ruh ban buh da u nongpahara uba kyrpang u ban khmih bniah halor ki rukom pyndonkam ïa ka um. Ki bor ba dei khmih ki la kyntu ïa ki nongshong shnong ba ki la dei ban long kiba phikir bha ha kaba ïadei bad ka jingpyndonkam ïa ka um khnang ba kan ym long lehnohei ha kum kane ka por ba dang jur ka jingkyrduh um. Ki katto katne tylli ki jaka kiba la shah ktah jur na ka jingkyrduh um ki kynthup ïa ka Whitefield, Yelahanka bad Kanakpura.
