
New Delhi, ïaïong:
Ki nongïalam na palat 24 tylli ki konstitwensi jong kynhun ka liang pyrshah ka Indian National Developmental Inclusive Alliance (INDIA), kynthup u heh nongïalam jong ka seng Congress u Mallikarjun Kharge, bad u President jong ka seng Samajwadi Party (SP) u Akhilesh Yadav, ki la ïalumlang ha Ranchi ha ka Sngi U Blei na ka bynta ban pyni ïa ka bor bad ka jingkhlaiñ jong ka kynhun synrop.
Ha kane ka sngi, kine ki nongïalam ki la buh ka jingkyrpad ïa ki paidbah ba ki la dei ban pynkut noh ïa ka jingsynshar kaba shiphew snem jong ka seng Bharatiya Janata Party (BJP) ha kaba la ong ba ka la don jingthmu ban pynkylla ïa ka Riti synshar. Ki nongïalam jong ka liang pyrshah ki la pynshisha da kaba ong ba u Myntri Rangbah jong ka Delhi u Arvind Kejriwal bad u Myntri Rangbah barim jong ka Jharkhand u Hemant Soren, ki la shah set patok naba kim pyndem hakhmat ka sorkar kaba bat ïa ka jingsynshar ha ka ri.
Ha kane ka jingïalang ki la don ar tylli ki shuki ba thylli ha kaba la tah da ki kyrteng jong kine ki nongïalam kiba la shah set patok ha ka rynsan ban pyni ïa ka jingdonlang jong ki ha ka por ba la pynlong ïa ka “Ulgulan Nyaya Maharally” shwa ban pynlong ïa ka jingthep vote na ka bynta ki 14 tylli ki Lok Sabha konstitwensi ha ka ilekshon ha Jharkhand ha ki saw tylli ki bynta ka ban sdang naduh ka 13 tarik, Jymmang.
U nongïalam jong ka seng Congress u Rahul Gandhi, ka Myntri Rangbah jong ka West Bengal ka Mamata Banerjee, ka bym shym la leit ban ïasnohkti ha ki jingïalang paidbah jong ki kynhun ka liang pyrshah bad u heh nongïalam jong ka seng Communist Party of India (Marxist) u Sitaram Yechury kim shym la lah ban ïashim bynta ha kane ka jingïalang paidbah, ha kaba u Kharge la kynthoh jur ïa ka seng BJP.
“Ki paidbah ki burom ïaphi [ki Dalit, ki riewlum bad ki baduk] namar ka Riti synshar. Balei phi pyrkhat ba ki kyrtong ki leit shaman ki thliew ïing jong ki baduk, ki riewlum, ki Dalit bad ki kynhun ba dang sahdien? Ka la long namar ka Riti synshar jong u Babasaheb kaba ailad ïaphi ïa ka hok ban thep vote. Lada phi iehnoh ïa ka vote jong phi, phin ym ïohlad shuh sa shisien pat. U Modi u la kwah ban pynkylla ïa ka Riti synshar. Balei phi pyrkhat ba ki kwah palat ïa ki 400 tylli ki konstitwensi?”
Baroh ar ka kynhun INDIA bad ka seng kaba bat ïa ka jngsynshar ka Bharatiya Janata Party (BJP) kaba lamkhmat ïa ka kynhun National Democratic Alliance (NDA) ki la pynshisha ba ki la tam lypa hadien ba la dep ban pynlong ïa ka jingthep vote ha ka bynta kaba nyngkong jong ka Lok Sabha ha kylleng ki jaka jong ki 102 tylli ki konstitwensi ha ka sngi Thohdieng.