Tura, Ïaïong 22
Ki pulit ka South West Garo Hills (SWGH) ha ka janmiet Lah Sngi U Blei ki la ong ba wat la ym pat shym la kem ïano-ïano ha ka jingshah thombor jong 2 ngut ki khynnah kynthei ba dang hapoh 18 snem ka rta hajan ka Chenga Benga Mela, hynrei ki la nang jan ha ka ban pynithuh ïa katto-katne kiba lah ban ïadon bynta ha katei ka kam be-aiñ.
Ha ka 17 tarik mynta u bnai, ha ka por kumba 9:30 baje mynmiet, ka kynhun kumba 10 ngut eiei ba suba dei ki nong Assam, ka la leh be-ijot ïa 2 ngut ki khynnah kynthei bad ktah kti ruh ïa ki paralok shynrang jong ki hashuwa ban phet krad na kata ka jaka.
Kitei ki khynnah (ba hapoh 18 snem ka rta) hapdeng ka jingkulmar jingmut wat hadien jong kaei kaba la jia baroh kaba ki hap ban ïaid lyngba, da ka jingshlur ki la leit phai biang sha ïing bad ujor ïa 3 tylli ki ejahar ha thanat Ampati ha ka 18 tarik mynta u bnai.
Wat la kawei na kitei ki khynnah ka la shah shoh haduh bym tip briew shuh, bad ym don jingtip katno ngut na katei ka kynhun kiba la leh ïa katei ka kam sang pyrshah ïa ka, kawei pat na kitei ki 2 ngut kaba la tip briew ha katei ka jingjia, ka la pyntip ba ki don bun ngut ki runar, kiba baroh ki la shim kabu ïa ka.
Ki jingthoh ha ki rynsan lad pathai ki la kynnoh ruh halor ka jingdon bynta jong palat 20 ngut ki runar jong katei ka kynhun kiba la leh ïa katei ka kam be-aiñ pyrshah ïa ki 2 ngut ki kynthei lem bad 2 ngut ki paralok jong ki (baroh kiba dang hapoh 18 snem ka rta).
Hadien ki ejahar, ki pulit ka SWGH ki la sdang ïa ka jingtohkit jong ki.
“Ngi la dep pynithuh ïa u laiñ tohkit jong ngi bad ngi ïatreilang bad ki pulit Assam ban lap ïa kiba suba donkti. Ngi la kylli jingkylli ïa bun ngut ki briew bad ngi khmih lynti ban shen ngin sa lap ksai,” la ong u SP ka distrik, u Vikas Yadav.
Katei ka jingjia ka la pynkhynñiuh shi kat dei ïa ka Ri-lum Garo baroh kawei bad bun ki la dawa na bynta ka jingpynshitom ba mardor pyrshah ïa kito kiba donkti ha katei ka kam. U nongaiktien ka BJP bad MDC ka Tura, u Bernard Marak u la pynrem jur halor katei ka jingjia ban kyrpad ruh na bynta ka jingkyrshan ïa ki lanot kiba la ngat ha katei ka apot.
