Shillong, Ïaïong 22
Ka STCC Pongtung Cluster bad ka Mawsynram Cluster ki la khur ïa ka jingjop ha ka lympung ïalehkai (L) Benjamin Diengdoh Memorial U-15 Boys Inter Cluster Cricket Tournament 2024 ba la pynïaid da ka East Khasi Hills Cricket Association.
Ha kane ka jingïakhun kaba ka la long ha ka lah sngi U Blei ha Shortimai Syiem Stadium kaba ha Smit, ka STCC Pongtung Cluster ka la pynliem noh ïa ka Laitjem Cluster da 16 run.
Ka STCC Pongtung kaba la shimti ban tied nyngkong, ka la kamai 76 run bad shah pynhap 10 wiket ha ki 17.1 over. U Mebanlambha Lyngshiang u la tied 14 run na ki 42 bol. Katba u Badkidonlang Pathaw u la khur 3 wiket na ka bynta ka Laitjem.
Haba wan beh ïa ka thong, ka Laitjem Cluster ka la kamai tang 60 run bad shah pynhap 10 wiket ha ki 12.5 over. U Wanrahbok Kharsati u la tied 10 run na ki 13 bol. Katba u Meban-lambha Lyngshiang u la khur 4 wiket na ka bynta ka STCC Pongtung. Ïa ka nam Man of the Match la khur da u Mebanlambha Lyngshiang.
Haba phai sha kawei pat ka jingïakhun kaba ar, ka Mawsynram Cluster ka la jop da 12 run ia ka Sohra Cluster (B). Ka Mawsynram Cluster kaba la kam trai ban tied nyngkong, ka la kamai 118 run bad shah pynhap 10 wiket ha ki 20 over. U Nangsan Kynter u la tied 23 run na ki 19 bol. Katba u Mewan Malngiang u la khur 2 wiket na ka bynta ka Sohra Cluster (B).
Haba wan beh ïa ka thong, ka Sohra Cluster (B) ka la kamai tang 106 run bad shah pynhap 10 wiket ha ki 16.4 over. U Damechwa Khongsngi u la khyrwit ïa ka shiteng spah kaba 54 na ki 43 bol. Katba u Nangsan Kynter u la khur 2 wiket na ka bynta ka Mawsynram Cluster. Ïa ka nam Man of the Match la khur da u Nangsan Kynter.
