Shillong, Ïaïong 22
U trai jong ka dukan Saw Aïom Restaurant, Bah Shanborlang Sohtun, u la ong ba ka jingjia kaba la jia ha ka miet jong ka Sngi Saitjaiñ ka 20 tarik u Ïaïong halor ka jingmih ka huri-hura ha ka dukan jong u kaba don ha Them Ïewduh hajan ka basa sohsaw hapdeng ki nongtrei dukan bad ki khynnah Punjabi kiba shong ba sah ha Them Metor kam dei ka jingpyrshah jaitbynriew.
Kum ban shu kdew hangne ba ha ka miet jong ka 20 tarik u Ïaïong ka la mih ka huri-hura hapdeng ki kharmetor kiba dei na ka jaitbynriew Punjabi kiba shong ba sah ha Them Metor bad ki khynnah Khasi.
Katkum ka jingtip la ong ba ka jingkulmar ka la sdang na ka daw ka jingleh baheh jong katto-katne ki kharmetor kiba don kumba 4-5 ngut eiei kiba la leit ban dih ban bam hapoh ka Saw Aïom Restaurant ha kaba kitei ki briew ki la pyneh ban siew ïa ka bai bam bad ka bai dih jong ki kaba la poi pat shaduh u pud ka jingïakynroi hapdeng ki nongtrei katei ka dukan bad kitei ki kharmetor.
Shuh shuh la ong ba ïa katei ka jingïakynroi na katei ka jaka bam la lah ban tem noh da ka jingwan kloi jong ki pulit. Pynban wat hadien ka jingïasuk ruh la ong ba ka la don ka jingmih jong ki paidbah kumba 50-60 ngut ki Punjabi kiba ïaleh shongshit bad thmu ban thaw jingkulmar shabar jong katei ka jaka.
Haba ïoh ban ïakren bad u Bah Shanborlang Sohtun ha ka Lah Sngi U Blei, u la ong ba kane ka jingjia kam dei ka jingjia kaba heh ne ka jingjia ba don ka jingsngew ïapher jaitbynriew hynrei ka dei tang namar ba ki Punjabi kiba wan ban shong bam bad dih ha katei ka dukan ki la pyneh ban siew ïa ka pisa bai bam hadien ba ki trai ki la beh namar ba ka la dei ka por ban khang noh ïa ka dukan.
U la ong ba ha katei ka miet ba jia katei ka jingjia, ki la don 4 ngut ki Punjabi kiba la wan bam ha katei ka jaka bam jong u. Hynrei hadien ba la dap 10 baje, kitei ki Punjabi ki la shong sah wat haba la ong ïa ki ba kin mih noh hynrei kim treh satia kumta namar ba ka la dei ka por ban khang noh ïa ka dukan. Kumta ki la shu beh jubor ïa kitei ki briew pynban kitei ki Punjabi ki la byrngem ba kin nym siew ïa ka bai bam jong ki bad ka dei ha katei ka por ba ka la mih ka jingïania kaba jur hapdeng kitei ki nongtrei katei ka jaka bam bad kitei ki Punjabi.
Na ka liang kitei ki nongtrei katei ka jaka bam ki la pyntip ïa katei ka jingjia sha ki pulit bad hadien katto-katne por ki pulit ki la wan poi ha katei ka jaka. Hadien kata ki pulit ki la lah ba tem noh ïa katei ka jingkulmar bad ki la rah noh ïa kitei ki khynnah Punjabi lem bad ki nongtrei jong katei ka dukan sha thanat.
Haba kylli halor ka jingmih jong ka kynhun ki Punjabi kaba don kumba 30-50 ngut ki briew katkum ka dur khih kaba la saphriang, na ka liang u trai jong katei ka dukan u la ong ba um tip eiei halor kata ka jingjia kaba shabar namar na ka liang jong ki, ki la mih noh ban leit sha thanat bad ki la khang noh ïa katei ka dukan.
“Ngim tip shuh kaei kaba jia hadien jong kata namar ka la dei ka por mynmiet bad uba don shabar ruh uba la buaid suda, ngim tip shuh ba dei mano hynrei ka jingjia na ngi kam da dei eh ka jingjia kaba ïashoh ïadat hapoh ka dukan hynrei ka dei tang ka thma ktien namar ba la wan noh u pulit “, la ong u Bah Sohtun.
