Mawkyrwat, Ïaïong 22
U heprit Elambok Dkhar, 13 snem ka rta, u dei u khun rangli bym don kmie don kpa shuh bad u shong u sah bad ki bahaïing hasem ha ka shnong Wahsiej kaba jngai kumba 7 km eiei na Mawkyrwat, South West Khasi Hills.
Une u heprit u la paw hadien ba u la lah ban pyllait im ïa kawei ka khynnah kaba la ïaksaid hapoh um. U Elambok u dei uba dang pule ha ka Klas 7.
Ha ka Sngi U Blei, utei u heprit, katba u dang leit sum shapoh wah, u la ïohi ïa ka jingïaksaid jong kawei ka khynnah hapoh um ïa kaba tip kyrteng kum ka Saphibanroy Thongni, 15 snem ka rta. Khlem jingsheptieng, une u heprit u la ryngkoh shapoh um bad u lah ban pyllait im ïa ka.
Katkum ka jingïathuh jong u heprit Elambok, u la ong ba mar sien ïohsngew ïa ka jingpyrta bad haba u la ïohi ïa ka jingksaid hapoh jong katei ka khynnah, wut-wut u la leit ban ïarap ïa ka.
U la ïathuh ruh bad ha kata ka jingïarap, katei ka khynnah kaba la don hapoh um ka la tan lang ïa u bad bat ruh na ki tyrpeng haduh ba ka la buh jingma sa ïa u ruh. Hynrei u heprit Elambok u la ong ba u la shu ktik ïa katei ka khynnah bad mar sien pyllait ïa u, u la mih shabar ban ring mynsiem bad hadien kata u la suh khlieh biang shapoh um bad ïoh ban tan ïa ka haduh ban da poi sha ryngkew.
Hynnin ka sngi, saw ngut ki khynnah kynthei ki la leit jngi kai sha ka wah Rilang, hynrei ar ngut na ki, ki la khlad noh na ka jingngam jyllop. Kawei pat ka la lait im namar ka jingshlur jong utei u heprit uba la khlem tyngkai ïalade.
Kitei ki ar ngut kiba la khlad ki dei kiba la tip kyrteng kum ka Shabakmenlang Wanñiang, 16 snem ka rta, bad ka Aishabankmen Thongni, 14 snem ka rta, katba ïa ka Saphibanroy Thongni kaba la lait im la pynkit noh wut-wut sha Mawkyrwat Civil Hospital ban ïoh ïa ka jingsumar.
