Kyiv, ïaïong:
Katkum ki khubor, la ong ba ka Israel ka la leit ther bom biang sha ka nongbah Rafah ha ka Sngi U Blei ha kaba palat mar shiteng na ki nongshong shnong ka nongbah Gaza ki don ha katei ka bynta. La ong ba ki don kumba 2.3 Million ngut ki paidbah kiba shong rieh tngen ha katei ka nongbah ba ka Israel ka leit ban ther bom naphang ha katei ka sngi.
La ong ba ha katei ka miet, ka Israel ka la ther bom sha katei ka bynta jong ka nongbah Gaza bad kaba la shim ruh ia ka jingim jong 22 ngut ki briew kynthup ia 18 ngut ki khynnah. Kane ka la jia katba ka United States ka dang pynkhreh ruh ia ki Billion Dollar ki ban phah sha ka tnat shipai ka Israel kum ka jingai jingkyrshan ia ka hapdeng ka jingiakhun bad jingiakynad jong ka bad kiwei pat ki ri marjan.
Ha katei ka sngi la iohi ia ki khynnah Palestine kiba shong hajan katei ka iing kaba la julor namar ka jingleit ther bom jong ki liengsuiñ ka Israel bad kiba la shong khuslai bad sngew kut lad namar ba ka jingim jongki kam ioh jingsuk shuh wat la ka jing Israel bad ki Hamas ki la iakren ban pynsangeh bad pynkut noh ia ka thma ha katei ka nongbah.
Namar la ong ruh ba ka Israel kam shym la pynsngap ia ka jingkyntu bad jingmaham jong ki ri bad ki tnat bapher ba ka la dei ban sangeh noh ia ka jingleit hiar thma sha katei ka bynta jong ka nongbah Gaza bad kumta ruh ka Israel ka ju leit ban thombor la jan man ka sngi sha katei ka thaiñ Rafah khlem da ailad ia ki 2.3 Million ngut ki paid nongshong shnong ba lui-lui kiba don ha katei ka nongbah bad kiba la shu im satar katba ki dang ap ia ka thma hapdeng ka Israel bad ki lehnoh Hamas ba kan kut noh.
Katba, na ka liang ka Israel pat, u Myntri Rangbahduh ka Israel- u Benjamin Netanyahu u la ong ba ka Israel ha kine ki sngi ki ban wan kan nang pynjur ia ka jingleit thombor sha Gaza namar ymdon lad da kumwei pat lait na kane ban ai jingsneng ia ka Hamas ba kan pyllait noh ia ki briew kiba ka la rahbor na Israel baroh. Hynrei u Netanyahu um shym la kren ne pynshai eiei shuh lait tang na kitei ki kyntien kiba u la kren bad iathuh ha ki lad pathai khubor ha katei ka Sngi U Blei namar ka jingbitar jong ka Israel halor ka jingbym pynsngap jong ka Hamas haba la phah ban pyllait noh ia ki briew jong ka Israel kiba ka la rahbor naduh kaba sdang jong ka thma ha u Risaw jong u snem 2023 ba la leit.
Ha katei ka miet, la ong ba ka jing-leit ther bom ba nyngkong jong ka Israel sha Rafah, ka la shim ia ka jingim jong uwei u rangbah, ha ryngkat bad ka kurim bad i khun ba 3 snem jongki bad kane ka long katkum ka jingtip na ka hospital Kuwaiti kaba la pynbna ba la ioh pdiang ia ka met jongki hadien katei ka jingjia. La ong ba katei ka longkmie kaba khlad ruh ka dei kaba dang pun sa iwei pat i khyllung ha ka kpoh jongka bad baroh ki la duh ei ia ka jingim ha katei ka jingjia. Katba, ka jingleit ther bom kaba 2 pat ba ka Israel ka la thombor ha Rafah ha katei ka miet, ka la shim ia ka jingim jong 17 ngut ki khynnah bad 2 ngut ki longkmie.
La ong ba kitei ki khynnah kiba khlad baroh ki dei kiba dang iohthiah lyngngai ha ka jaka ba la sumar bad ri ia ki naduh ba ka thma Israel ka la neh slem da ki katto katne bnai mynta. U khyllung uba rit tam na kitei kiba khlad baroh u dei uba dang don tang 1snem 6 bnai ka rta.
Ka jingleit hiar thma ba khlem sangeh jong ka Israel ka la shim ia palat 34,000 tam ki mymsiem ba lui-lui hapoh Gaza naduh ba sdang jong ka thma ha u snem ba la leit tad haduh kane ka kynti ba mynta, ha kaba 2 naka 3 bynta na kitei kiba khlad ki dei ki longkmie bad ki khyllung-khynnah.
Shuh shuh ruh la ong ba katei ka song jingiarap kaba $26 Billion ba la mynjur da ka iing myntri sorkar jong ka United States ha ka Sngi Saitjaiñ, ka kynthup ia $9 Billion ki jingiarap naka bynta ki paidbah nongshong shnong ka Gaza.
