Raipur, ïaïong:
Ki shipai ïada ri ki la ithuh ïa baroh 29 ngut ki lehnoh Maoist kiba la shah siat ïap ha ka jingïasiat kaba markylliang ha Kanker ha ka taïew ba la lah, la ïathuh ki heh ba dei khmih kiba ïoh jingtip shaphang kane ka bynta, ha kaba la bynrap shuh shuh da kaba ong ba kine ki dkhot ka kynhun lehnoh ki dei kiba la thmu ban leh ïa ka kam thombor kaba shyrkhei shwa ban pynlong ïa ka General Elections ha Bastar.
Ha kaba ïadei bad kane, ki pulit jong ka Chhattisgarh ha ka Sngi U Blei ki la ong ba ki lehnoh Maoist ki la shah pynïap ha ka por ba ka la don ka jingïasiat kaba markylliang bad ki shipai ïada ri ha Bijapur distrik jong ka jylla.
“Ngi ngeit ba ha shwa ka ilekshon, ki dkhot jong ka MMC (Madhya Pradesh-Maharashtra-Chhattisgarh) Zonal Committee ki la ïalum lypa ha ka jylla na ka bynta ban leh ïa ki kam thombor ki ban long pyrshah ïa ki shipai ïada ri,” la ong ki heh jong ka kynhun kiba tohkit bad buddien halor kane ka jingjia ki bym shym kwah ban pynpaw kyrteng, ha kaba ki la bynrap shuh shuh da kaba ong ba kine ki dkhot jong ki lehnoh ki dei kiba na Chhattisgarh, Telangana bad Maharashtra.
Ki lehnoh Maoist ki la ïapait sha ki Zonal Committees ha kaba kine ki la treikam na la kijong ki jaka khlem phai sha kiwei pat. Ka MMC Committee, ïa mynta ka la treikam tang haduh Rajnandgaon, ka jaka kaba jngai da kumba 150km na ka jaka ba la jia ka jingïasiat na Kanker.
“Kine ki la don ha ka bynta jong ka khlaw, kaba hap hapoh ka thaiñ kaba don ha ka jingheh kaba 20×20 sq km, na ka bynta katto katne taïew ne ka lah ban long da shi bnai. Ki shipai jong ngi ki la ïai bteng ha ka ban wad jingtip shaphang kane khyndiat sngi ha shwa ban don ka jingïasiat kaba markylliang. Ki la pynlong ïa ki jingïalang ha kaba ïadei bad ka jingthmu jong ki ban leh ïa ki kam thombor ha ka por ba don ka ilekshon,” la ong uwei pat u heh ba dei khmih.
Ka Kanker kan sa pynlong ïa ka jingthep vote ha ka bynta kaba ar jong ka General Elections ha ka 26 tarik, Ïaïong.
Ki heh ba dei khmih, ki la ïathuh ba ha ka sngi U Blei ki la ithuh ïa ki heh nongïalam jong ka kynhun lehnoh ha ki thaiñ kiba don ha ka shnong Partarpur kiba kynthup ïa u Sukhlal, Shrikant bad u Jugni, lai ngut ki briew kiba dei ki nongïalam jong ki kynhun ha ka thaiñ baroh kawei, ha kaba kine ki la shah pynïaid ha u heh nongïalam jong ka kynhun lehnoh Maoist u Shankar Rao, uba la long uwei napdeng ki 29 ngut ki lehnoh kiba la shah pynïap ha ka jingïasiat kaba markylliang ha Kanker.
