Jowai, Ïaïong 22
Ka Khasi Students’ Union (KSU), East Jaiñtia Hills District Unit ka la kynnoh ba ki shipai BSF kiba ap pahara ha Sonapyrdi ki la bom bad shoh dusmon ïa ki briew bad ruh ban pynjulor ïa ki kali ha ka 21 tarik mynta u bnai.
Katkum ka khubor la ong ba kane ka la jia ha ka por kumba 9 baje eiei mynmiet, hynrei ym lah ban tip na kaei ka daw ba ki lai ngut ki briew ki la shah shoh shah tied ha ki BSF, la ong u General Secretary KSU, East Jaiñtia Hills District Unit, u K.S Suchiang.
La ong ba kine kiba la shah tied shah bom ha ki BSF ki dei na ka shnong Thangskai bad Lum Tongseng.
Nalor kata, la kynnoh ruh ba ki shipai BSF ki la bom naphang ïa ki ar tylli ki kali haduh ban da julor, pait ki ïit na ka bynta ba shadien bad shakhmat. Kine ki kali ki dei ka Maruti Espresso.
Na ka liang jong ka KSU halor kane ka jingjia, ka la pynrem jur ïa ki shipai BSF kiba la thombor ïa ki briew ba lui-lui na ka por sha ka por, katba ïa ki khar Bangladesh kiba prong tuh bad leh ki kam bymman ba har rukom kim ju ïoh kem satia.
Ka KSU ka la pyntip ba halor kane ka jingjia, kan lum ïa ka jingïalang ha ka 23 tarik mynta u bnai ha shlem treikam ka seng ha Lad Rymbai.
