Shillong, Ïaïong 22
Ka Voice of the People Party (VPP) ha ka Lah Sngi U Blei ka la pynbna ba ka la beh seng noh sa ïa 2 ngut ki dkhot ba kynthup ïa u Bah Shanlang Warjri bad u Bah Kherup Sing Thabah namar ki kam pyrshah seng jong ki.
Ka jingshah beh seng jong kitei ki 2 ngut ka long lyngba ki shithi ba la phah (la ka jong) sha ki, ïa kaba la soi da u Chairman ka Disciplinary Committee ka VPP, u Dr. Kara H. Shen bad u General Secretary, u Bah Grossper Ryntathiang.
“Kumba la bthah da ka State Executive Committee (SEC), ngi kiba la soi kyrteng ngi kwah ban pyntip sha phi ba ka seng ka la shimkhia ïa ki jingkynthoh jong phi lyngba ki rynsan lad pathai, ha kawei ka liang ki bym ïahap satia na bynta u dkhot jong ka SEC,” la ong ki nongïalam ka VPP ha ki shithi ba la phah sha kitei ki 2 ngut.
Kitei ki shithi ki ong ruh ba ka seng ka la shong pyrkhat bad khmih bniah halor ka jingleh bad jingkynthoh jong kitei ki 2 ngut bad ka la paw shai ba ka jinglong jong ki kam ïahap satia bad ki nongrim jong ka seng.
“Ka jingleh jong phi ka la wanrah ïa ka jingjah burom ïa ka seng bad ka pyntlot ïa ki jingpyrshang jong ngi ban pynneh-pynsah ïa ka jinglong hok bad ban kyntiew ïa ka ‘agenda’ jong ngi,” la ong ki nongïalam.
Kumta ha kaba ïadei bad katei, na ka liang ka VPP ka la shim ïa ka rai ban beh seng noh ïa kitei ki 2 ngut halor ki jingkynthoh jong ki pyrshah ïa ka seng.
Kum ban shu kdew hangne, u Bah Shanlang Warjri u dei u kyrtong jong ka VPP na Mairang konstitwensi ha ka ilekshon MLA jong u snem 2023, katba u Bah Kherup Sing Thabah u dei u Working President jong ka VPP Mairang Circle.
Ka Voice of the People Party (VPP) ha ka Sngi Saitjaiñ ka la pynbna ba ka la beh seng noh ïa u Bah Avner Medon Pariat uba long u dkhot jong ka seng hadien ba u la pynmih ïa ki jingthoh kiba long pyrshah ïa ka seng bad kiba kyrshan ïa kawei pat ka seng.
U Bah Pariat u dei u kyrtong jong ka VPP na East Shillong konstitwensi ha ka ilekshon MLA jong u snem 2023 bad u khlem poi sha ka thong jong ka jingjop hadien ba u la shah rem ha ka kyrtong ka NPP ka Dr. Mazel Ampareen Lyngdoh.
