Srinagar, ïaïong:
Ka National Investigation Agency (NIA) hynnin ka sngi ka la pynlong ïa ka jingleit khynrah sha kumba 9 tylli ki jaka kiba don ha kylleng ka nongbah Srinagar kaba don ha Jammu & Kashmir kum shi bynta ban ïakhun pyrshah halor ka jingïasuhbuit sniew ba la leh da ki kynhun lehnoh jong ka Pakistan, kiba kynthup ka kynhun Laskhar-e-Taiba (LeT), Jaish-e-Mohammed (JeM), Hizb-ul-Mujahideen (HM), Al-Badr, Al-Qaeda hapoh ka ri.
Ki seng kiba dang thaw thymmai kiba kynthup ïa ka The Resistance Front (TRF), United Liberation Front Jammu & Kashmir (ULFJ&K), Mujahideen Gazwat-ul-Hind (MGH), Jammu & Kashmir Freedom Fighters (JKFF), Kashmir Tigers, PAAF ki la ngat ha kane ka jingshah khynra ha kaba ïadei bad ka jingjia.
Ki shipai na ki tnat ïada ri ki la shah pyntreikam ha kiba bun ki jaka katba ki heh jong ka NIA ki la pynlong ïa ka jingleit khynra.
Ka NIA ka la buh jingmudui halor ka jingjia hapoh ka (RC-05/2022/NIA/JMU) da ka jingpyntreikam lajong ha u bnai Jylliew, 2022 na ka bynta ban tohkit bniah halor ka jingdonkti jong kine ki kynhun lehnoh, ki nongïarap jong ki kynhun lehnoh bad kiwei pat kiba la shah suba donkti bad ki kynhun lehnoh kiba dang dep seng thymmai ha kaba ïadei bad ka jinglum bad ka jingsam ïa ki bom kiba shu pyndambit ne ki Sticky bombs/Magnetic bomb, IED, ka pisa, ki drok, ki tiar siat halor ka jingthmu ban pynjur ïa ki kam pyntriem jong ki lehnoh, ka jingpynkheiñ kyndon bad ki jingïakhih ha ka jylla barim ha Jammu & Kashmir ba hashwa.
Na ka jingtohkit jong ka kynhun haduh mynta la paw shai bad ki kynhun lehnoh na Pakistan ki la pyndonkam da ki Social Media na ka bynta ban pynjur ïa ki kam pyntriem jong ki lehnoh, bad ki la pyndonkam ruh da ki Drone na ka bynta ban leit sam bad leit pynhap ïa ki tiar siat, ki drok bad kiwei pat sha kito kiba la ju ïatreilang ne sha ki para dkhot jong ka seng ha kylleng ki jaka jong ka thaiñ Kashmir.
