Beijing, ïaïong:
Kiba bun ki wah heh kiba don ha ka thaiñ Guangdong jong ka China, la ong ba ki lah ban wanrah ia ka jingshlei um kaba jur ha katei ka nongbah bad kumta kane ka la pynlong ia ka sorkar China ha ka Sngi U Blei ba kan phah ia ka jingmaham sha ki paidbah nongshong shnong bad ha kajuh ruh ka por ka la pynkhreh ban thaw lad lypa kumno ban ai jingiada ia ki 127 Million ngut ki nongshong shnong jong katei ka nongbah lada ka jingshlei um kan wan lynshop ia katei ka nongbah kumba la maham lypa da ki tnat ba dei khmih.
Namar la ong ba katei ka nongbah ka la don hapdeng ka jingbym shngaiñ hadien ba la iohi ia ki wah kiba don ha kylleng sawdong jong ka kiba la dap bad sdang ban shlei khamtam ha ki wah jong ka Xijiang bad Beijiang kiba ka um ka la kiew bha ban ia kaba ju long ha ki snem ba la leit.
Namarkata, ka tnat ba dei khmih ia ki um bad ki wah jong ka China ka la phah ia katei ka khubor sha ki lad pathai khubor ban maham lypa ia ki paidbah ba kin long ba la pynkhreh ban mih na ki iing ki sem lajong ynda ki bor pyniaid ki la dep ban pynkhreh ia ki jingdonkam bad ka jaka sah na ka bynta jong ki haba katei ka jingshlei um ka la jan.
Kumjuh ruh ki heh jong ka Guangdong ki la bthah ia ki nongkitkam shnong bad ki tnat ‘Municipal’ ban pynkhreh noh ia ki lad jingiada ban tehlakam bad ban iada ruh ia ki paidbah na ki jingma ynda haba katei ka jingshlei um kan jia ha kine ki sngi ki ban wan.
La ong ba katei ka thaiñ ka long pat ruh ka bynta kaba kongsan tam ia ka China namar ka dei kaba don ia kiba bun ki karkhana bad ki kompeni kiba kyntiew ia ka kam khaïi- pateng jong ka China bad ki bor pyniaid ki la pyntip ruh ba katei ka thaiñ ka la sakhi lypa ia ka lyer bad ka jinghap slap mynta la kumba katto katne sngi.
