Mawkyrwat, Ïaïong 22
Ka Mawlangwir Sports Club ka la pynhap pyrda noh ïa ka lympung ïalehkai kaba heh duh ha ka thaiñ kaba la tip kum Mawlangwir Football Tournament 2023-24 ba la pynlong ha ka Lah Sngi U Blei ha madan Rowell Lyngdoh, Saitsnad Mawlangwir, South West Khasi Hills District.
Ka Golden Lion FC ka la ïoh ban rah ïa ka nam lahduh hadien ba ka la lah ban pynliem noh ïa ka Shillong Lajong FC da 2-1 kol.
Haba phai sha ka jingïalehkai ha kane ka sngi ha ryngkat ka jingsakhi da ki hajar ngut ki paidbah ka jinglehkai ka long kaba itynnad bha. Ha ka kylla step baroh ar tylli ki kynhun ki la pyni ïa ki sap ïalehkai ba itynnad bad ïoh ruh shibun ki kabu ksiar ban pynkhih jar, hynrei haduh ba kut ka kylla step ki la poi ha ka jingïakhaid.
Haba phai sha ka kylla miet ka jingïalehkai ka la kham itynnad shuh shuh ha kaba baroh ar kynhun ki la ïakhun tyngeh ban ïoh ïa ka nam jop bad dei ha ka minit kaba 57 ba ka Shillong Lajong ka la ïoh ban pynkhih ïa ka jar ba nyngkong lyngba u Figo.
Ka jingïalehkai ka la nangïaid bad ka Golden Lion ruh kam shym la duh jingkyrmen bad pyrshang ban ñoin tyngeh bad dei ha ka minit kaba 74 ba ka Golden Lion ka la ïoh ban pynïakhaid lyngba u Shane Sohktung bad bud sa ka kol na u J. Nongtdu ha ka ka minit kaba 90+2 bad ban pynlong ïa ka Golden Lion FC ban rah syndon ïa ka nam lahduh ha kane ka lympung.
Ïa ka nam Best player ha kane ka lympung la ïoh ban khur da u Collin Lyngdoh jong ka Shillong Lajong, Best Goalkeeper ka leit sha u Badan Chetri jong ka Golden Lion bad ïa ka nam Top Scorer la ioh da u Shane Sohktung jong ka Golden Lion.
Ïa kane ka lympung ha kane ka sngi la wan ban pynhap pyrda da u Bah Hamletson Dohling, President ka Meghalaya Football Association (MFA) ha ryngkat ka jingdon u Bah Mandilos Nongbri kum u Symbud Kongsan, ki nongkitkam ka Mawlangwir SC, ki riew rangbah bad kiwei kiwei.
