Shillong, Ïaïong 22
Ki seng bapher-bapher kiba don ha Ri lum Garo ha ka Lah Sngi U Blei ki la phah da ka jingthoh sha u Deputy Commissioner (DC) jong ka West Garo Hills ban pyrkhing ïa ka por ban shah rung ïa ki trok khamtam ki trok ‘Dumper’ sha sor Tura hadien ba ar ngut shipara ki la shah syllad ha ka trok ha Tura Ballongre.
Ki seng ba kynthup ïa ka GSU, FKJGP, AYWO, ADE bad FAF ha ka dorkhas ba la phah sha u DC ka West Garo Hills ki la kyntu ban leh eiei noh mardor halor kane ka kam.
Shuh shuh ha katei ka shithi, na ka liang kine seng ki la ong ba ki kwah ban ai jingmut, ba dei ban pyrkhing ïa ka por ba ïaid ki trok ba rung ne mih na Tura sha kiwei ki jaka bad dei ban pyntreikam biang ïa ka hukum ba la pynmih da u DC barim u Pravin Bakshi, uba la pynbeit ïa ka por ban nym shah rung ïa ki trok sha Tura bad sha kiwei pat ki jaka ba marjan naduh ka por 7 baje mynstep haduh 7 baje janmiet. Kitei ki seng haba dawa ban siew bai dawai bad ka bai lutksan sha ki bahaïing jong kitei ar ngut ki lanot kiba la ngat ha ka jingshah tynrah trok, ki la pynpaw ruh ba ka jingshah rat kali jong ki briew ka la kiew bha.
Shuh shuh ki la ong ba nalor ka jingpyrkhing ïa ka jingïaid jong ki trok, ki bor pynïaid district ki dei ruh ban peit pyrman ïa ka jingïaid sted ki kali ban ïada ïa ki nongïaid lynti bad ban lait na ka jingjia aksiden.
