Guwahati, ïaïong:
Uwei u briew uba la 25 snem ka rta u la shahkem ha Tripura katba u dang pyrshang ban rung beaiñ sha Bangladesh. Kumba la ïathuh ki heh pulit, la ong ba une u briew u dei uba la kha ha Pakistan bad u dei u nongshong shnong jong ka Bangladesh uba la rung beaiñ sha India.
Ïa une uba la shahkem la tip kyrteng kum u Ayan Alam, une u la shahkem ha ki nongshong shnong jong ka Jalefa kaba don ha ki bynta jong ka South Tripura distrik ha ka miet jong ka sngi Palei bad ïa une la aiti noh sha ki pulit.
Ha ka por ba la ïa ka jingkhmih bniah na u Alam la ïoh ban kurup ïa ka Mobile Phone, ka pisa bad katto katne ki kot sakhi ban pynshisha ba u dei u nong India, kynthup ka Aadhaar Card.
“Ha ka por ba la pynlong ïa ka jingtohkit, une uba la shahkem u la ong ba la kha ïa u ha Pakistan bad u la shong shnong ha Bangladesh. Na ka jingtohkit bniah la tip ba u la dei na ka shnong Mayarampur jong ka Brahmanbaria distrik jong ka Bangladesh,” la ïathuh ki pulit.
Kane ka jingïoh ban kem ïa une u briew ka la long naba ki pulit ki la pynjur ïa ki jingpahara ha ki bynta khappud bad ba ki la kyntu ïa ki paidbah ba ki la dei ban khmih bniah ïohba don ki briew ba nabar ri kiba rung beaiñ sha ka ri.
