Shillong, Ïaïong 22
Ka Hynñiewtrep Integrated Territorial Organisation (HITO) ka la ai por shi taïew ïa ka Sorkar ban pynbeit ïa ka rta thep kam ha ka tnat Pulit.
“Ngi ai por shi taïew ïa ka Sorkar ban pynbeit ïa kane ka kam bad lada kam lah, ngi kyntu ïa kiba thep ïa kane ka kam ban mih madan ban dawa ïa ka hok,” la ong u President ka HITO, Bah Donbok Dkhar.
Ka seng ha ka Lah Sngi U Blei ka la phah shithi sha u Myntri Rangbah ka Jylla, u Conrad K. Sangma ban pynkynmaw biang halor ka jingpynjynsur ïa ka rta na bynta kito kiba thep ïa ki kam bapher-bapher ha ka tnat Pulit.
“Na ka liang ka seng, nga kwah ban ai khublei ïa phi na bynta ki jingpyrshang haba ïadei bad ka jingtei ïa ka Meghalaya bathymmai bad ka jingsynñiang jong phi sha ki paid nongshong shnong ka Jylla,” la ong u Bah Dkhar ha ka shithi ba la phah sha u Myntri Rangbah.
U la ong ruh ba ka seng ka la thoh ïa ka shithi ban kyrpad ïa u Myntri Rangbah ban pyrkhat biang halor ka mat ba ïadei bad ka jingpynjynsur rta na bynta ka jingthep kam pulit hapoh ka Jylla.
“Ka jingthep kam bad ka jingthep aplikeshon lyngba ka ‘online’ na bynta ki kam ba sah thylli bapher-bapher ha ka tnat pulit bad tnat pynlip ding ki dang ïaid bad ngi kyrpad ïa phi ban don jingsngew lem halor ka rta jong ki nongthep kam,” u la ong.
U Bah Dkhar u la pynkynmaw ruh ba hashuwa, ka seng ka la dep thoh sha u Myntri Rangbah halor katei ka bynta bad sa shisien ka kyrpad biang ïa u ban pyni ïa ka jingisynei sha ki nongthep kam kiba la tam ïa ka rta thep kam namar ka daw jong ka khlam bad ki jingktah jong ka ïa ka imlang-sahlang kumjuh ïa ka jingim ba man ka sngi jong ki briew.
“Kiba bun ki khun samla ki angnud ban shakri ïa ka Jylla lyngba ka tnat pulit bad ki hap ban long ki nongkamai ban kyrshan la ka ïing ka sem kiba ïaksaid na bynta ka kam ka jam namar ka rta jong ki. Da ka jingpyrkhat sbun jong phi halor kane ka bynta, ka lah ban wanrah ka jingkylla kaba khraw ïa kito kiba wad kam wad jam, bad ki paidbah kin da sngewnguh eh ïa phi bad ka Sorkar jong phi,” u la ong.
Shuh shuh u la bynrap ba kum u nongïalam ka Sorkar MDA, ka seng kyrpad ïa u Myntri Rangbah ban sngap ïa ka sur ki paidbah kiba ïaksaid na bynta ki kam ki jam.
“Ngi kyrpad ruh ïa phi ban buddien halor ka shithi kaba la phah teng da ka seng (Ref/HITO/CB/APO11) halor katei ka mat,” la ong utei u nongïalam ka HITO.
