Babu Kular Khongjirem
Kynsan-kynsan, ha ka janmiet jong ka 17 tarik Ïaïong 2024, ka sorkar Meghalaya lyngba u Deputy Commissioner bad District School Education Officer (DSEO) East Khasi Hills, Shillong ki la shu pynbna hak-dak (sudden announcement) ba ka 18 tarik Ïaïong 2024, kata, shi sngi shwa ban thep ‘vote’ ha ka sngi 19 tarik Ïaïong 2024 dei ban ai shuti noh (declare holiday) ïa baroh ki jaka pule ha baroh ki jaka pule (educational institutions) kiba don ha kylleng sawdong ka nongbah Shillong khnang ban ailad ïa ki nongtrei election (polling parties) ba kin ïoh ïaid kylluid sha la ki jong ki jong ki kam (election duties).
Hynrei kum kane ka rukom pynbna kyrkieh hak-dak ïa ka shuti ïa ki jaka pule kam long satia kaba itynnad. Jait ba kane ka juk mynta ka dei ka juk jong ki social media (mobiles, internets, etc), ka long la ka long. Jin lada kam dei ka juk social media, kaba shu pynbna shuti shimiet- shimiet na ka bynta ka lashai mynstep ka dei ban long tang ka kam ïap kam im ki bym lah shuh ban kiar (immediate causes). Ha ka jingshisha, lada ka sorkar ka donkam ban ai shuti lang ha ka 18 tarik Ïaïong 2024, ka dei ban pynbna lang ha kajuh ka por ba ka la pynbna ïa ka 19 tarik Ïaïong kaba dei ka sngi shuti thep ‘vote’.
Ka jingpynbna shuti kyrkieh shimiet-shimiet da ki bor sorkar ka la wanrah ka jinglyngngoh bad jingkulmar jingmut (confusion) ym tang ïa ki bor pynïaid skul/kolej hynrei khamtam eh ïa ki khynnah pule bad ki kmie ki kpa jong ki. Ka shuti ka la pynartatien shibun eh ïa ki. Ban leit skul/kolej ruh ki artatien, ban leit ruh ïoh dei ka shuti, kan shu lehnohei ka por jong ki. Ha ka jingshisha, kano-kano ka shuti sorkar dei ban da pynbna (announce) da ki bor pynïaid skul/kolej, hynrei ka shuti kaba shu ïohsngew tang na suiñ, ka lah ban dei ka khubor thok ne ka shuti thok ruh (fake news) namar ngi ïohi mynta ba bun eh sa tang ki khubor lamler (fake news) khamtam eh ha ki social media.
Ki don bun kiba shu ïa antad ba ka sorkar ka ai shuti noh naduh ka 18 tarik Ïaïong 2024 namar bun ki nonghikai ki ïaleit kam election. Ban lait na ka jingduh shim klas jong ki ha ka sngi leit kam election jong ki ha ka 18 tarik Ïaïong 2024, ka bha ban pyllait shuti noh syndon shi sngi shwa ba kin mih sha ki jaka thep ‘vote’. Ban ong ba ka sorkar ka pyllait shuti ban lait na ka dheng kali (traffic jam) ruh kam don jingmut satia namar don ki sngi ki sngi kiba jur bha ka dheng kali wat lada ym dei satia ki sngi leit kam election ruh. Lada ka sorkar ka pyrkhat pat ba bun ki skul/kolej ki dei ki jaka thep ‘vote’ (polling stations) ha manla ki shnong, kata, dei ban ai shuti lang salonsar ïa baroh ki skul kiba don ha sor bad ki skul kiba don ha nongkyndong ruh kumjuh ha baroh kawei ka Jylla khlem leh shiliang ïano-ïano ruh. Tang kawei ka jingeh ka long ba kane ka jingpynbna shuti ka sorkar nangne shakhmat kan long noh pynban kum ka dustur ai shuti (precedence) ba dei ban ai shuti noh 2 sngi ha manla kano-kano ka por election.
Tangba, dei ruh ban kynmaw ba nangne shakhmat, dei ban pyntip lypa sha baroh ki bor pynïaid skul/kolej khnang ba kin ïoh pynbna lypa ïa ki khynnah pule ha skul/kolej jong ki, lym kumta ka pyni ba ka sorkar kam kheiñ snep, ka shu kheiñ dewthala bad ibeiñ ïa ka bor bad ka iktiar (authority and prestige) bad shu leh katba mon ïa ki bor pynïaid skul/kolej bad kata hi kan ktah shi katdei eh ïa ka lawei ka thoh ka pule ha ka jylla jong ngi.
