Shillong, Ïaïong 22
Ka Rangdajied United FC ka la long ka klob kaba nyngkong eh ban jam sha ka semi final ha ka lympung ïalehkai Shillong Premier League 2023 hadien ba ka la lah ban pynliem noh ïa ka Nangkiew Irat SC da 2-1 kol ha ka lah sngi U Blei ha SSA Stadium kaba ha First Ground, Polo.
Kane ka nam jop ka la wan urlong lyngba ka kol ba la thep khatduh da u Wanlamsuk Nangkhlaw shwa ban kut artad ka jingïalehkai na ka bynta ban pynlong ïa ka RUFC ban kynjoh sha ka thong.
Lyngba kane ka jingjop kaba san sien, ka Rangdajied ka la lah ban kamai 15 point na ka bynta ban jam sha katei ka kyrdan watla ka dangsah sa ar sien ïakhun. Katba ka Nangkiew Irat ka la ïai sah ha ka kyrdan ba hynñiew bad kamai mar 3 point bad ka Nongthymmai, kaba la tam lyngba ka jingïapher kol.
Ha kane ka jingïakhun baroh ar ki kynhun ki la ïakhun tyngeh naduh kaba sdang ha kaba ki la ïoh ïa ki kabu kiba biang, hynrei kim shym la lah ban pynkhih jar. Hashwa ban kut ka jingïalehkai jong ka kylla step ka RUFC kaba long ka lahduh ha ka Meghalaya State League, ka la ïoh ban thep kol nyngkong eh lyngba u Ïeitlang Syiemlieh ha ka minit kaba 45 na ka bynta ban tam da 1-0 kol.
Hadien katto katne por ba la bteng ïa ka jingïakhun jong ka kylla miet, ka Nangkiew Irat ka la lah ban pynphai kylla ha ka mint kaba 77 lyngba u Flavius Lalruatkima na ka bynta ban ïakhaid mar ar kol.
Kane ka jingïakhaid ka la pynlong ïa kine ki kynhun ban ïai bteng ha ka ban ïakhun tyngeh shuh shuh. Hapdeng kane ka jingïa-khun, u Wanlamsuk u la lah ban pynurlong na ka bynta ban thep ha ka minit kaba 90+2 bad ban pynlong ïa ka Rangdajied ban khur syndon ïa ka jingjop.
Ka jingïalehkai ha ka sngi Ba-ar kan long hapdeng ka Mawlai SC pyrshah ïa ka Shillong Lajong FC ha ka por 3:15 janmiet. Ka Mawlai kaba long ka lahduh ha ka aïom ba la lah, ka la don ha ka kyrdan ba-ar bad kamai 10 point, katba ka Lajong kaba don ha ka kyrdan balai, ka la kamai 9 point na ki saw sien ïakhun.
