Shillong, Ïaïong 22
Ka President jong ka Bharatiya Janata Party (BJP) Mahila Morcha ka Kong Susuki Pariat ha ka shithi jingujor ba la phah sha u Chief Justice (CJ) jong ka ïingbishar High Court of Meghalaya, ka la kyntu na ka bynta ban shim ki lad jingpynshitom mardor (sou moto case) ha kaba ïadei bad ka jingjia shah leh be-ijot kaba la jia ha South West Garo Hills.
Ha kane ka shithi kaba la phah sha u Chief Justice bad ai kopi ruh sha u Director General of Police (DGP) ka Meghalaya, ka Kong Susuki Pariat ka la kdew halor ka jingjyllei ki kam runar bad kyntu na ka bynta ban shim da ka ‘suo moto’ pyrshah ïa kito ki nongleh kam sniew.
Shuh shuh kane ka shithi na ka BJP ka la kyrpad na ka bynta ban pynlong ïa ka jingtohkit kaba bniah da ka tnat Pulit bad ban kem kloi ïa ki briew kiba donkti, da kaba pynpaw ruh ba ka don ïa ka jingshaniah kaba pura ha ka ïingbishar.
Ka Kong Susuki Pariat ka la ïathuh ba ha ka janmiet jong ka 17 tarik mynta u bnai kaba dei ruh ka sngi lehkmen ïa ka Chenga Benga Mela, ki ar ngut ki khynnah kynthei ki la shah thombor bad shah leh be-ijot kaba la jia hajan ka thaiñ Garobadha ha South West Garo Hills.
Ka la pyntip ruh ba na ka liang jong ki pulit ki la dep ban pynrung mukotduma hapoh ka thanat Ampati bad ka jingtohkit ka la ïaid shakhmat. Ha kaba ïadei bad kane, ki pulit ka South West Garo Hills ki la dep ban thaw ïa ka SIT ban tohkit bniah halor kane ka kam
