Tura, Ïaïong 22
Ka nongtrei mon sngewbha na Tura, ka Jaynie N. Marak ka la ujor ejahar pyrshah ïa u nongkitkam ka NPP, u Kritenbirth R. Marak halor ka jingkynnoh ban beiñ ïa uwei u briew uba don jingduna ha ki dkhot met, u Milam N. Sangma bad pynsaphriang pat ïa ka dur khih jong u ha ki rynsan lad pathai na bynta ki kam saiñ pyrthei.
Ïa ka ejahar la ujor ha u Officer In-charge ka thanat Tura ha ka Lah Sngi U Blei.
“Ha ka dur khih, ha kaba u la pynsaphriang ha ki rynsan lad pathai, u la beiñ ïa u Sangma kumjuh ïa ki nongthep ‘vote’ kiba la kyrshan ïa ka Congress. U Sangma namar ka jingduna jong u, um don jingtip eiei halor ka jingmut bad jingktah jong katei ka dur khih kaba la shna halor jong u. Kane ka jingleh u Marak ym tang ba ka thad ïa ka burom ka ijot hynrei ka kdew shai ïa ka jingthmu ban pynlehraiñ bad shim kabu ïa u na bynta ki kam saiñ pyrthei,” la ong ka Jaynie ha ka ejahar da kaba bynrap ba kitei ki jingleh jong u Marak ki pynkheiñ ruh ïa ka MCC naba katei ka jingjia ka la jia ha ka 18 tarik mynta u bnai, shi sngi shuwa ka sngi thep ‘vote’.
Haba kdew ba katei ka jingleh ym tang ba ka donkam ïa ka jingpynrem, hynrei ka pynkheiñ ruh ïa ki aiñ jong ki briew kiba duna dkhot met katkum ka Rights of Persons with Disabilities Act, 2016.
Na ka liang ka Jaynie ka la dawa ban pynshitom mardor ïa u Marak da kaba pynngat ïa u hapoh ki kyndon ba ïahap jong ka aiñ.
Ha kawei ka liang, ka jingujor haba ïadei bad kane, la dep phah ruh sha ka Election Commission of India (ECI) da ka Jaynie.
Kum ban shu kdew hangne, u Milam N. Sangma u dei u para jong ka kurim barim u kyrtong ka Congress na Tura Parliamentary konstitwensi, u Saleng A. Sangma.
