Shillong, Ïaïong 22
Ka khubor na ki pulit ha ka Lah Sngi U Blei ka ïathuh ba u Returning Officer ka Shillong Parliamentary Constituency u la ai da ka jingujor sha ki pulit ba ha ka 19 tarik Ïaïong, 2024, uwei u briew ïa uba la tip kum u Lamphrang Kharbani u la pynsaphriang ïa ka dur khih kaba u la ring katba u dang thep ‘vote’ hapoh ka jaka kaba don ka kor thep ‘vote’ (EVM) ha RCLP School, Mawkawsiang (East Wing) Polling Station.
Ha kawei pat ka jingjia, uwei u Volunteer ka tnat Home Guard ïa uba la tip kyrteng kum u Teiborlang Khongshei, u la ujor ba ha ka 19 tarik Ïaïong ha ka por kumba 6 baje janmiet, u nongñiah bad saw ngut ki nongshong ha kawei ka kali kamai (ML-05M-5208) ki la shoh la dat ïa u katba u dang don ha ka kam ha ka jingkieng Umïam, Mawïong Rim bad hadien ba ki la thombor, ki la phet krad na kane ka jaka. Shuh shuh ka khubor na ki pulit ka ïathuh ba ha ka 20 tarik Ïaïong ha ka por kumba 3 baje mynstep, phra ngut ki runar ki bym lah ban ithuh ki la shoh la dat ïa ar ngut ki briew ba la tip kyrteng kum u Aibasting Mawlong, 28 snem, bad u Bashimti Ryntathiang, 20 snem, ha ka shnong Mawmaram, East Khasi Hills. Kine ar ngut ki la mynsaw malu-mala bad la leit rah ïa ki sha Sohïong CHC ban ïoh ïa ka jingsumar.
Nalorkata, ki pulit ki la ong ba uwei u briew ba la tip kyrteng kum u Jahanur Rahman Sarkar u la ujor ba ha ka 6 tarik Ïaïong ha ka por kumba 11 baje mynstep, ar tylli ki Remote Radio Unit ba shongdor kumba ` 2,28,002 ki la jah na ka jaka ba don u ‘Tower’ jong ka kompani Airtel ha Buripara, Doldamgre kaba don ha West Garo Hills.
