Shillong, Ïaïong 22
Ka jinghap slap kloi mynta u snem bad ka jingkham biang ha ka rukom sam bording ka la ïarap shisha ïa ka Meghalaya Energy Corporation Limited (MeECL) ban pynïaid ïa ki kam bad ym pat donkam ban pynlip bording ilektrik, ym kumba ka la jia ha u snem ba la dep ha kaba ka Jylla ka mad shisha ïa ka jingkyrduh bording kaba shyrkhei.
Haba ïakren bad u Chairman cum Managing Director (CMD) ka MeECL u Sanjay Goyal, u la ong ba ka long kaei-kaei kaba kmen ïa u bad ïa ka MeECL namarba ym pat treikam ka jingpynlip bording ilektrik bad yn dang peit thuh ïa ka jinglong-jingman haduh u Jymmang.
U la ong ba ka jinghap slap kloi katto-katne ka la ïarap ban pynbiang ïa ka jingdonkam ïa ka um ban pynmih bording ilektrik.
Hynrei u la ong ba lada ka jinglong-jingman ka dawa, yn sa peit ha u bnai Jylliew bad yn sa shim ïa ki sienjam khnang ban nym don ka jingshah ktah than ïa ki paidbah.
Haba kylli halor ka jingthut ka bording ha kine ki sngi, u Goyal u la ong ka daw ba ka MeECL ka hap ban pynlip bording hateng-hateng ka dei namar ka jinglong ka suiñbneng kum ka jingjur lyer, ka jingthied pyrkhat, ‘leilieh bad ka jingkhyllem ki dieng kiba pynjulor ïa ki sainar ilektrik bad transformer ha kaba donkam ban pynlip ïa ka bording ilektrik ha ka por ba dang ïaid ka jingmaramot.
Kumta u la ong ba ka jingthied bording ka dei kaba dang donkam namar ka Jylla ka dang duna ha ka jinglah ban pynmih bording ilektrik.
U la ong ba ka bording kaba shu thied ka kham bun na ka NEEPCO, Gas Plant kum na Assam bad Palatana kaba don ha Tripura.
Lah ban pynkynmaw hangne ba ka Jylla ka la mad ïa ka jingkyrduh bording ilektrik ha u snem ba la dep namar ka jingdon ka um ha ki jaka pynmih bording ruh ka la hiar bad nang rngat namar ka jingrang tyrkhong ka suiñbneng khlem hap slap.
Ka pung Umïam ka dei kawei na ki jaka pynmih bording kaba la shah ktah bha bad ka um ha kane ka pung ka la hiar shaduh shatrai ha kaba la ïohi ruh wat ïa ka surok barim kaba la shna naduh ka por jong ka Sorkar Phareng.
Ka jinghap slap ha u snem 2023 ka la sdang haduh u Jylliew bad ka jingrang tyrkhong khlem hap slap ka la bteng haduh u Jymmang.
