Nongstoiñ, Ïaïong 22
Ka shlem treikam u Mission Director jong ka National Health Mission, Meghalaya, Shillong ka pyntip sha ki paidbah baroh ba ka tnat ka Koit ka Khiah jong ka jylla kan sa pynlong ïa ka jingai dawai wieh hapoh ka Jylla na ka bynta ki khyllung khynnah kiba naduh 1 snem haduh 19 snem ka rta, ha ka 24 tarik mynta u bnai, bad ki jaka ban ai dawai wieh kin long ha baroh ki skul, Anganwadi Centre, Sub Centre bad ki hospital sorkar. Ha ka kyrwoh khubor ba la phah la ong ba lada don mano-mano ki bym ïoh lad ban dih ïa u dawai wieh ha ka 24 tarik, ki paidbah kim dei ban khuslai namar lah ban dih ïa u dawai wieh, ha ka ka sngi pynkut (mop-up day) ka ban long ha ka 1 tarik u Jymmang, 2024.
Shuh shuh la ong ruh ba shibun ki jingmyntoi na ka bynta ka koit ka khiah yn ïoh lada yn ai dawai wieh ïa ki khun ki kti. Kita ki long, ka pyllait na ka jingduna snam bad kan pynkhlaiñ bam, ka ïarap ïa ka bor pyrkhat pyrdaiñ, ka ïarap ha ka jingsan bad jingkhlaiñ ka bor met, ka ïarap ha ka pule-puthi bad ha ka jingsmat jingsting, ka pynduna ïa ka jingpep skul.
“To ngin ïada ïa ki khun jong ngi na ka jingdon wieh, bad wat pynsep ei ïa kane ka lad ka kabu kaba ka sorkar ka ai na ka bynta ka koit ka khiah ki khun ki kti ki jong ngi khnang ba kin ïoh ïa ka lawei kaba phyrnai,” la ong ka kyrwoh khubor.
