Shillong, Ïaïong 23
Ki kynhun ïalehkai jong ka Sohra Cluster (B) bad ka Sohra Cluster (A) ki la ïoh jingjop ha ka lympung ïalehkai (L) Benjamin Diengdoh Memorial U-15 Boys Inter Cluster Cricket Tournament 2024 ba la pynïaid da ka East Khasi Hills Cricket Association.
Ha kane ka jingïakhun kaba ka la long ha ka Sngi Ba-ar ha Shortimai Syiem Stadium kaba ha Smit, ka Sohra Cluster (B) ka la pynliem noh ïa ka Maw-ryngkneng Cluster da 8 wiket. Ka Mawryngkneng ka la kam trai shwa ban tied nyngkong ha kaba ka la kamai 81 run bad shah pynhap 9 wiket ha ki 20 over. U Hamebandap War u la tied 24 run na ki 23 bol. Katba u Riquel Nongbri u la shim 4 wiket na ka bynta ka Sohra Cluster (B).
Haba wan shimti ïa ka pali kaba ar, ka Sohra Cluster (B) ka la lah ban kynjoh sha ka thong da kaba kamai 83 run bad shah pynhap 2 wiket ha ki 10.4 over. Kane ka la wan urlong lyngba u Dame-shwa Khongsngi uba la ïoh ban khyrwit ïa ka shiteng spah da kaba ïoh 57 run na 34 bol. Katba u Damewanbiang Shadap u la shim 1 wiket na ka bynta ka Mawryngkneng. Ïa ka nam Man of the Match la khur da u Damewanshwa Khongsngi.
Haba phai sha kawei pat ka jingïakhun kaba ar, ka Sohra Cluster (A) ka la jop da 99 run ïa ka Laitjem Cluster. Ka Sohra Cluster (A) kaba la shimti ban tied nyngkong, ka la kamai 155 run bad shah pynhap 6 wiket ha ki 20 over. U Sumit Rai top u la tied 63 run na ki 29 bol bad u Bashai Kupar Nongdhar u la ïoh 34 run na ki 31 bol. Katba u Melamjingshai Kurbah u la shim 3 wiket na ka bynta ka Laitjem.
Haba wan beh ïa ka thong, ka Laitjem Cluster ka la kamai tang 56 run bad shah pynhap 10 wiket ha ki 12.2 over. U Melamjingshai Kurbah u la tied 23 run na ki 18 bol. Katba u Othaniel Lyng-doh Nongbri u la shim 5 wiket na ka bynta ka Sohra Cluster (A) bad ban khur ruh ïa ka nam Man of the Match.
