Nongstoiñ, Ïaïong 23
Ki longkmie kiba ju shong die jhur hapoh ka sor Nongstoiñ, ha ka Sngi Ba-ar ki la mih na ki jaka shong ban leit ïakynduh ïa u Deputy Commissioner (DC) ka West Khasi Hills halor ka jingshah khang ki kali kit jhur.
Ki longkmie kiba ju shong die jhur hapoh ka sor Nongstoiñ, haba kren bad ki nongthoh khubor hadien ba la dep ban ïakynduh ïa u DC, ki la ong ba ka daw kaba la pynlong ïa ki ba kin hap ban mih na ki jaka shong die, ka long hadien ba ki nongdie jhur ki la mad jingeh namar ka jingshah khang ki kali kit jhur kiba wan na sor Shillong ba kin rung haduh Nonbah ban pynhap ïa ki mar ki mata ha ki por mynsngi bad kaba la shah ban rung tang naduh ka por 8 baje janmiet shaneng.
Shuh shuh la ïathuh ruh ba ha katei ka jingleit ïakynduh ïa u DC, ki longkmie ki la aiti ruh ïa ka jingthoh ba un shimkhia ban tuklar lem ïa katei ka jingeh.
Kitei ki nongdie jhur ki la ïathuh ba kawei ka long ba ïa ki jhur ki jhep la phah na Shillong bad namar ba la shah khang noh ban rung ki kali ba kit sha ïew lane sha Nonbah, ka la pynlong ïa ki ba kin mad ïa ka jingeh.
Kumta, ha kane ka jingïakynduh, ki nongdie jhur ki la kyrpad ïa u DC ban shah ïa ki kali kiba ki phah kit jhur ban wan pynhap shapoh ïew lane shapoh Nonbah bad ba dei ban ïoh lad kumba ju leh naduh mynshuwa, la ong kitei ki longkmie.
Shuh shuh ki la ïathuh ruh ba ha jingleit ïakynduh ïa u DC, u la pynshai ïa ki ym ba la khang ïa ki kali ba kit ïa ki mar hynrei la khang tang ïa ki kali kamai, bad ynda la dep pynhap ïa ki nongshong kali hapoh jaka ïeng kali, ba kin sa leit ban buh sa tang ïa ki mar shapoh ïew bad ym shah ïa ki kali ban thep briew napoh Nonbah ne ïew hynrei ki dei ban leit noh wut-wut sha ka jaka ïeng kali hynrei ha ka jingbym ïa sngewthuh jingmut la shah khang baroh.
Ki longkmie kiba shong die jhur ki la ïathuh ruh ba halor katei ka bynta, u DC u la ong ba un shimkhia ïa katei ka kam bad un sa ïa pynbeit bad ïakren ruh bad u SP ka West Khasi Hills.
