Shillong, Ïaïong 23
Ka Meghalaya Football Association (MFA) ka dang ïai ap khmih lynti ban ïoh ïa ka jingpynthikna na ka Sorkar Jylla na bynta ka jingbei tyngka halor ka lympung ïalehkai Megha-laya State League 2024.
Wat la kiwei ki lympung ïalehkai ha ki district bapher bapher jong ka Jylla ki la lah ban pyndep ïa baroh ki lympung ïalehkai jong u snem 2023 bad ruh ban pynthikna ïa ki kynhun ki ban mihkhmat sha katei ka lympung, hynrei mynta ka MFA ka dang hap ban ap sa na ka lympung ïalehkai jong ka Shillong Sports Association ka Shillong Premier League, kaba dangsah teng.
Haba ïakren bad ki nongthoh khubor ha ka Sngi Ba-ar, u Vice President ka MFA u Bah Cliff Nongrum u la ïathuh ba ïa mynta ka synjuk ka dang ap na ka lympung ïalehkai Shillong Premier League ba la pynïaid da ka SSA. “Ynda la kut ka SPL ngin sa la lah ban tip kiei ki kynhun ki ban ïoh rung sha ka MSL bad ruh na ka liang ka synjuk ngin dang-ïa ap ruh na ka jingpynthikna sa na ka Sorkar Jylla ka ban ïoh ka jingïarap ban bei tyngka na ka bynta kane ka lympung.”
“Ki jinglut na ka bynta ka MSL ki long kiba bun, te kum ka synjuk ngim lah ban shu rai ban pynlong noh namar ngi donkam ban ïoh shwa ïa ka jingpynthikna na ka Sorkar Jylla ba kan ïarap ban bei tyngka na ka bynta kane ka lympung,” la ong u General Secretary u Bah Sunesh Syiem.
Kat kum ki kyndon jong ka All India Football Federation (AIFF) ki kynhun ki ban rah ïa ka nam lahduh ha ki lympung ïalehkai jong ki jylla bapher bapher jong ka ri kin ïoh ïa ka lad ban mihkhmat sha ka Third Division League. Te kumta ka MSL ka long kaba kongsan na ka bynta ban sei ïa ka kynhun ka ban rah ïa ka nam lahduh bad ka ban ïoh ruh ïa lad ban leit shim bynta sha katei ka lympung.
“Ngi kyrmen ban pynlong ïa ka MSL ha ka taiew ba khatduh u Jymmang mynta u snem, hynrei lada jia ba ngim pat ïoh ïa ka jingpynthikna na ka Sorkar ngin ym pat lah ban ïaid shakhmat ïa kane ka lympung namar ka jinglut ka long kaba bun,” la bynrap u Bah Nongrum.
Lah ban pynkynmaw ba ka jingpynlut ha ka MSL jong ka aïom ba la dep ka long palat T. 1 klur tyngka ha kaba la ïashim bynta da ki klob bapher bapher jong ka Jylla bad ka Rangdajied United FC ka la long ka lahduh ha kaba ka la ïoh ruh ban leit shim bynta ha ka Third Division League.
