Jowai, Ïaïong 23
Ka Phramer Cricket Club ka la pynliem noh ïa ka Northeast Adventist University Cricket Club da 258 run ha ka lympung ïalehkai District Cricket League 2024 ba la pynïaid da ka West Jaiñtia Hills District Cricket Association.
Ha kane ka jingïakhun kaba la long ha ka Sngi Ba-ar ha madan Khliehtyrshi Mini Stadium, ka Phramer Cricket Club kaba la jop ïa kynting pisa ka la shimti ban tied nyngkong bad kamai 302 run ha ka 35 over bad shah pynhap tang 6 wiket. U Sauni Nongtdu u la tied 90 run na ki 77 bol bad u Nan u la ïoh 80 run na ki 55 bol. Katba na ka liang ka NEAU, u Rikku T Sangma u la shim 3 wiket.
Haba wan beh ïa ka thong, ka NEAU ka la shah pynhap baroh ki nongtied na ka bynta ban kamai tang 44 run ha ki 11.5 over. U Waizer CH Sangma u la tied 16 run na ki 22 bol. Katba na ka liang ka Phramer u Nan bad u Monjurlang Suchiang ki la shim mar 3 wiket. Ïa ka nam ‘Man of the Match’ la ïohpdiang da u Nan jong ka Phramer Cricket Club.
