Shillong, Ïaïong 23
Ha ka jingjia shah shukor, uwei u nongshong shnong ka South Garo Hills u la duh ei ïa ka pisa T.30,000 bad ka thuk-thuk ha uwei u briew uba la kam ïalade ba u dei u muktiar.
Katkum ka khubor na ki pulit, la ong ba utei u nongshong shnong u la ujor ba ha ka 20 tarik Ïaïong, u la ïoh pdiang ïa kawei ka ‘phone call’ ha kaba uta u briew u la pynithuh ïalade ba u dei u muktiar. La ong ruh ba uta uba la kam ba u dei u muktiar u la pynkohnguh ïa utei u nongshong shnong ban ïakynduh ïa u ha kaba ïadei bad ka jamin na ka bynta u khun jong u uba la shah set ha along hadien ba u la shah kem halor kawei ka jingujor POCSO Act.
Namarkata, utei u nongshong shnong na South Garo Hills ruh u la leit ïakynduh ïa utei u briew uba la kam ba u dei u muktiar ha kawei ka jaka ha West Garo Hills ha ka 21 tarik Ïaïong. Phewse, ha kata ka jingïakynduh, utei u nongshong shnong na South Garo Hills u la shah shukor pynban bad u la duh ei ` 30,000 bad ka thuk-thuk (ML-09A-8753), bad kiwei-kiwei.
