Shillong, Ïaïong 23
Hadien ka jingshah kem jong 5 ngut kiba ju donkti ha ki kam rahbor, ha ka Lah Sngi U Blei pat ki pulit jong ka South Garo Hills ki la ïoh kem syndon ïa u nongïalam jong kane ka kynhun ki nongrahbor na ka shnong Rapdikgre ha East Garo Hills.
Katkum ka khubor na ki pulit la ong ba une u nongïalam ka kynhun ki nongrahbor u dei ba la tip kyrteng kum u Rongsrang M Sangma, bad u dei ruh uba ju thaw lad thaw buit kumno ban rahbor ïa ki briew hapoh ka South Garo Hills District.
Ka jingïoh kem jong ki pulit ïa une u runar ka la long hadien ka jingïoh ïa ka jingtip kaba bniah, ha kaba ki pulit ki la leit ban kem napoh ka shnong Rapdikgre kaba hap hapoh ka thanat Williamnagar ha East Garo Hills, la ïathuh u Superintendent of Police (SP) ka South Garo Hills u Shailendra Bamaniya ha ka kyrwoh ba u la pyllait.
U SP u la pyntip ruh ba ha ka jingtohkit kaba la pynlong la lap ba u Rongsrang M Sangma u dei ruh uwei na ki dkhot ka GNLA (R) bad na ka bynta ka GNLA (R) ba u la leh ïa kine ki kam rahbor bad dawa pisa ha South Garo Hills.
Ki 5 ngut kiba la dep ban shah kem ha ki bnai ba la leit halor ka jingdonkti ha ki kam rahbor ki kynthup ïa u Wilban M Sangma, u Withmil Sangma, u Sengsrang Ch Marak, u Tengsrang Ch Marak bad u Aiber N Sangma bad lyngba ka jingïoh kem ïa u Rongsrang M Sangma, ki pulit ki la lah ban pyntroiñ ïa ki kam runar hapoh ka district.
