Shillong, Ïaïong:
Ka jingpoi ki nongthep ‘vote’ ha kane ka ilekshon MP ka long shisha kaba kham pher na kiwei pat ki ilekshon MP lada ïanujor naduh ka ilekshon ha u snem 2004.
Ha u snem 2004, ka jingpoi ki nongthep ‘vote’ ha ka ilekshon Lok Sabha ka long tang 52.69% ha Shillong bad Tura Parliamentary konstitwensi.
Hynrei mynta u snem 2024, ka jingpoi ki nongthep ‘vote’ ha ka ilekshon Lok Sabha ha baroh ar tylli ki konstitwensi ha Meghalaya ka la kiew bha kata haduh 76.60%. Tang ha Shillong ka jingpoi ki nongthep ‘vote’ ka long 73.78% bad ha Tura ka long 81.37%.
Ha u snem 2014, ka jingpoi ki nongthep ‘vote’ ka long 63.22% ha Shillong bad 78.13 % ha Tura Lok Sabha konstitwensi.
Ha u snem 2009, ka jingpoi ki nongthep ‘vote’ ha Shillong ka long 62.23% katba ha Tura Parliamentary Konstitwensi ka long 67.66%.
Ha Shillong Parliamentary konstitwensi ka ju dei beit ka jingjop ïa ka Congress bad ha Tura ka dei beit ka jingjop na ïing jong u nongïalam ba la khlad noh u Purno Agitok Sangma.
Lada ka Congress ka rem ha kane ka ilekshon 2024 na Shillong bad lada ka longïing u Purno Agitok Sangma ka rem ha kane ka kynti, ka dei ka jingrem ha ka sien banyngkong hadien bun phew snem.
