Shillong, Ïaïong 23
U MLA ka Congress na Umsning konstitwensi, u Dr. Celestine Lyngdoh, u la ong ba ka jingïakhun ha Umsning konstitwensi ha kane ka ilekshon MP Lok Sabha ka long hapdeng ka shap jong ka Kti bad u Prah.
Haba ïakren bad u Dr. Celestine u la ïathuh ba ka jingïakhun bad u kyrtong ka Voice of the People Party (VPP) ha Umsning konstitwensi ka dei namar u la ithuh ïa ki briew naba u la dep ïakhun ïa ka ilekshon MLA ha u snem 2023.
U la ïathuh ba ka Congress kan khlaiñ bha ha Jirang, Nongpoh, Mawhati bad ka don ka jingïakhaid pat hapdeng baroh lai tylli ki seng ha Umroi konstitwensi, kata, ka jingïaknieh vote hapdeng ka VPP, Congress bad NPP.
Nalor nangta, u la kam ba hadien ba la dep thep ïa ka ‘vote’, ka Congress kan wan nyngkong ha Shillong konstitwensi, ba ar ka VPP, ba lai ka NPP bad ba saw ka UDP.
“Nga ngeit skhem ba ki paidbah ki dang shaniah ïa ka Congress ban phah biang ïa u Bah Vincent Pala sha dorbar bah Parliament,” u la ong.
U la ong ruh ba lada ka NPP ka ong ba ka Congress ka tlot ma ki pat ki don katno ngut ki MP ha Parliament namar ka don tang kawei ka MP kaba ju mihkhmat na Tura.
U la ong biang lada ka UDP bad VPP ki ong ba ka Congress ka la tlot ma ki pat ki don katno ngut ki MP ha Parliament, hynrei ka Congress ka la don lypa 50 ngut ki MP.
Shuh shuh u Dr. Celestine u la ong ba wat ha Tura ruh u kyrtong ka Congress u don jingkyrmen ban jop namar ka jingïakhun ka long pyrshah ïa ka NPP.
U la ong biang ka BJP kam kwah ban jop ka Congress, hynrei ka BJP ka kmen lada jop kiwei ki seng.
