Shillong, Ïaïong 23
Ka khubor na ki pulit ha ka Sngi Ba-ar ka la ïathuh ba kawei ka nongshong shnong na Shillong ka la ujor ba hapdeng ka 28 tarik Rymphang, 2024 bad 4 tarik Lber, 2024, ki la don ki runar kiba la thok pisa ïa ka lyngba ka rynsan ‘Instagram’ kaba la kot sha ka T. 1.25 lak.
Ha kawei pat ka jingjia, u Bidasing Senar u la ujor ha ka miet jong ka 19 bad 20 tarik Ïaïong, ki runar ki la tuh ïa ka thuk-thuk jong u (ML-05Z-6193) na Madanrting Block-F, Shillong.
Nalorkata, ki pulit ki la ong ba u Havdyansu Sinha u la ujor ba ha ka 21 tarik Ïaïong, ki runar ki la tuh ïa ki sainar tama (Copper) na ka ïing jong u kaba dang shu dep shna ha Oakland, Shillong.
Shuh shuh ki pulit ki la ong ba u Stadlang Masharing u la ujor ba ha ka 21 tarik Ïaïong ha ka por kumba 2 baje mynstep, ki runar ki la leit prong tuh sha ka dukan jong u kaba don ha ka shnong Tyrso Nongkhyllem ha Ri-Bhoi.
Ha kawei pat ka jingjia, ki pulit ki la ong ba u Dingnen Sangma u la ujor ba ha ka 21 tarik Ïaïong, ka thuk-thuk jong u (ML-13-6269) ka la jah na Rongsai Kurung Bazar ha West Garo Hills.
Ki pulit ki la ong ruh ba u Sujit Prasad, Webcasting Operator, u la ujor ba ha ka 20 tarik Ïaïong, ki runar ki la tuh ïa ka CCTV Camera kaba la pyndait ha Gasuapara Bengali Govt. LP School, South Garo Hills, bad kane ka CCTV ka dei kaba la pyndonkam ha ka por ilekshon jied MP Lok Sabha.
