Shillong, Ïaïong 23
Ha ka Lah Sngi U Blei ki shipai BSF ryngkat ka jingïatreilang bad ki pulit Meghalaya ki la ïoh ban kurup haduh 44 hajar kilo ka shini kaba la thmu ban shalan bad khaïi be-aiñ sha Bangladesh.
Nalor ka shini ba la ïoh kurup, ki BSF bad pulit ki la ïoh ruh ban kem ïa 4 ngut ki nong India kiba donkti ha kane ka kam na ka thaiñ khappud kaba don ha South Garo Hills.
Kane ka shini kaba la ïoh ban kurup ka long na ki ar jaka, kawei na ki ïing jah kiba don ha khappud bad kawei na ka trok.
La ong katba ki pulit ki dang pahara ha khappud, la ïohi ïa ka jingïaid uwei u briew ha khappud bad ka Bangladesh kaba la ishan khmat ïa ka rukom ïaid bad kumta ki BSF ki la khang kdong. Ha kane ka jingïoh bat ïa une u briew la ïoh ruh ban kurup 790 byrni ka shini ba la buhrieh ha ïing jah.
Kitei saw ngut ki nong India kiba la shah kem ki dei na Goalpara jong ka jylla Assam. Ha kane ka jingap ktem la ïoh ban bat ar tylli ki trok ha Rongra kiba kit shini bad ki pulit ki la shimti ban leh ïa kaba donkam katkum ka aiñ.
