Bertina Lyngdoh
Ka hok ka don ha man u briew, bad man u briew u im ha ka bad ka jingpyndonkam ïa ka. Kum ki briew, ngi don ïa ki hok kiba kum ka hok ha ka ïoh ka kot, ka hok ka jinglong trai ïa ka khyndew ka shyiap, ka hok ka kam ka jam, ka hok ka jinglong trai dalade ïalade bad kiwei kiwei. Katkum na ka riti ka synshar ka khadar ka ri India, ki hok ha kaba u briew u dei ban ioh bynta ki kynthup ïa ka hok ka pule puthi, ka hok ka jinglaitluid, ka hok ka jingïaryngkat dor bad kumta ter ter. Kine ki long kita ki hok kiba paw ha ka jingpyndonkam ïa ki hynrei kaei pat kata ka hok kaba ngim lah ban pynpaw kaba hap ban tip hi tang lade shimet to ngin sngewthuh ïaka.
Ka ri India jong ngi ka dei ka ri kaba synshar paitbah. Kumta, shisien ha ka 5snem kala dei ka por ka pali ïa u paitbah ban jied ïa ki nongmihkhmat ka ri, ka jylla, bad ka district. Ka jingjied nongmihkhmat jong ngi kam die ba ngi jied tang ïa u nongmihkhmat hynrei kaba kongsan ngi jied ruh ïa ki nongsengsaiñ pyrthei bapher bapher. Don kiba ong ba lah ka seng saiñ pyrthei, don pat kiba ong ba lah ka seng saiñ rilum bad don ruh kiba ong ba lah u kyrtong shimet. Kine ki jingsngew ki ïapher na u wei sha uwei pat. Ngi jied ïa u kyrtong namar ngi sngew ba u ju kyrshan barabor ïa u paidbah, bad ngi jied ia ka seng saiñ pyrthei namar ngi sngew ba biang ka rukom synshar, kane keiñ ka dei hala hala ka jingsngewthuh. Jied te jied ïano u kyrtong ne kano ka parti, naba ka shong ha ka jingsngewthuh jongngi balei ngi jied ne kyrshan ïa u, ne ka parti. Wat ai pat ba ka jingjied jongngi kan long kum ka jingpynkulmar ne ka jingpynïapait ïa pra shiparalok, shi ïing shi sem shi kurim bad kiwei de kiba bun. Shuh shuh, kam long ruh kaba bha ban kylli ba jied ïano lane kano ka parti. ki nongmihkhmat ruh haba la mihkhmat na ka bynta uba bun balang, kam long kaba bha ban peit shiliang khmat haba la mihkhmat na ka bynta uba bun. Ha ka imlang sahlang ym baroh te uba kajuh ka jingsngewthuh namar kane kam long kaba bha ban pyndonkam ne pynpaw shynna ïa ka hok ka jingkied nongmihkhmat. La ai hangi ba jied laitluid kum kiba la kotbor ha ka jingsngewthuh ruh ka pyrkhat ka pyrdaiñ. Kumta ruh to ngin pyndonkam bha ïa ki. Wat thadrong ïalade kumjuh ruh ïa ki nongmihkhmat bad ka parti.
Te namarkata, kum kiba stad, bad ba shemphang bha ban lait na kano kano ka jingshah kdew kti pyndonkam hok la ka hok. To tip ba ïa kaba sniew ka ju paw shynna bha katba ïa kaba bha pat ym don toi uba kren ne kynmaw ïaka. Yn nai ki jingïakob ïa kiba sniew ioh ba kane kan ïalam bakla ïa uba bun balang. Ka jingstad ban jied kam dei lane kam lah ban long ba kyntu mano re mano hynrei ka dei ban long da ka mon ba laitluid. Ka jing-kwah ban ai lad thymmai ïa kiwei pat ki nongmihkhmat ka shong ha ka jingshemphang jong ngi hi hynrei kein ban pynkup ha kiwei. To peit pyrman ïa ki san snem bala leit shuwa ban jied thymmai na ka bynta ki san snem ban wan.
