Shillong, Ïaïong:
Ki samla wad kam ka jylla hapoh ka jingïalam jong ka samla Barilang Pyngrope, ha ka Lah Sngi U Blei jong ka 22 tarik u Ïaïong ki la leit ban ïakynduh ïa u Secretary ka Sorkar Jylla, Bah Cyril V. Darlong Diengdoh, IAS, ha ka kamra treikam jong u ha Additional Secretariat halor ka jingdawa ban pynjlan shuh ïa ka rta thung kam pulit na ka 27 snem sha ka 30 snem.
Haba kren sha ki lad pathai khubor hadien ka jingleit ïakynduh ïa u Bah Diengdoh, ka samla Barilang Pyngrope ka la ong ba na ka liang kine ki samla ki la pan ïa ka ‘Corrigendum’ lane ka jingthoh kaba donkam ban pynbeit ïa ki jingbakla ha kaba ïadei bad ka jingpynjlan ïa ka rta thep kam pulit bad ka jingpyntip paidbah ïa ka jingthep kam pulit khnang ba ki khynnah samla ka jylla kiba bun kin ïoh ban thep kam, hynrei na ka liang u Secretary u la ong ba ïa ka jingpynbna ym pat shym la pynmih satia.
“Ngi leit kylli kumno ka ‘notification’ kam pat mih hynrei ka jingpynbna pat ka la jan kut, bad kaba ar ngi kylli ïa ka ‘Corrigendum’ ba ki lah ne em ban ai hynrei ki ong ba ngin hap ban buh da ka jingthoh halor kata bad ïa kata ruh ngin buh”, la ong ka samla Barilang.
Na ka liang kine ki samla ki la ong ba ka jingkam bad ka jingai jubab jong ka sorkar ka long ka bym shai bad kum ki khynnah samla kin ïai bteng ban phah ïa ki jingthoh sha ka sorkar jylla.
Ka samla Barilang Pyngrope ka la ong ruh ba imat kane ka sorkar kam kwah ba ki samla kin kiew, hynrei ka la pyrshah ïa ki bad lada kim ai ïa ka jingthoh ba la pynmih, ka pynpaw shynna ïa ka jingleh shiliang jong ka sorkar bad kaba pynsah ïa ki khynnah ha ka umdum ka dei ba wat hadien ba la dep ban pyntip ïa ka jingpynbna paidbah halor kane ka jingthep kam.
“Kane ka jubab na ka sorkar ngim sngewthuh bad kumba ngi sngew kane ka sorkar ka pyrshah ïa ka jingkiew jong ki samla”, la ong ka samla Barilang.
Shuh shuh kine ki samla ki la pynpaw ruh ba na ka liang u Bah Diengdoh u la kyntu kylla ïa ki ba kin wad da kiwei pat ki jait kam bad na ka liang jong u, u la ong ba haduh mynta yn nym pat lah ban ai ïa ka jingkular halor ka jingpynjlan ïa ka rta thep kam na ka bynta ka kam pulit.
“Katba ngim pat ïoh ïa ka ‘Corrigendum’, ngin nym pat sangeh namar kine ki samla kin leit shaei bad ma ngi ngin leit shaei? Lada ngim ïoh ïa ka ‘Corrigendum’ te ka mut ka lah kut hi keiñ, ngi kyrpad rit ïa ka sorkar ba kan pynmih noh ïa ka ‘Corrigendum'”, la ong ka Barilang.
Kitei ki samla ki la ong ba kum ka sorkar kam dei ban leh ïa ki kam kiba long pyrshah ïa ki samla, hynrei ka dei ban long na ka bynta ki samla.
“Ka sorkar ka la ïalam bakla ïa ki samla naduh kaba sdang hynrei ngim kwah ban ong ba ngi dei kiba pyrshah sorkar, hynrei ngi kwah pat ba ka sorkar kam dei ban pyrshah than ïa ki samla”, la bynrap ka samla Barilang.
