Shillong, Ïaïong 23
U Myntri ka tnat Pule-Dangle ka Jylla, u Rakkam A Sangma, u la ong ba ka Sorkar ka la plie ka lad ïa ki samla ba kin shah hikai pyntbit ban ïakhun ïa ka eksamin UPSC na ka bynta ban pass bad ban poi sha ka kyrdan IAS ne IPS, hynrei kaba kongsan ruh ka dei ka jingkut jingmut nalade ban ïakhun tyngeh ban poi sha ka thong.
U Rakkam u la pynpaw ïa kane haba ïakren bad ki nongthoh khubor halor ka jingbym don na Meghalaya kiba pass ïa ka eksamin UPSC mynta u snem ban shahjied ban long ophisar IAS, IPS bad kiwei kiwei ki kyrdan ha ki tnat treikam ka Sorkar Pdeng.
U la ong ba ka long ka jingshisha ba ka Jylla ka khlem don ha ka thup jong ki Jylla kiba lah ban pynmih ïa kiba pass ïa ka eksamin UPSC mynta u snem.
U la ong ba ki don ki samla kiba stad bad ki dei ban shim ïa ka lad ban ïakhun ïa ka eksamin bad kaba kongsan hi ka dei ka jingkut jingmut nalade nalor ka jingai mynsiem bad jingkyrshan ïa ki.
Une u Myntri u la ong ba ka Sorkar ka plie ka lad ban ai jinghikai kum ka Meghalaya Administrative Training Institute (MATI) kaba la kyrshan ïa ki samla kiba shah hikai khamtam ban ïakhun ïa ka eksamin Civil Services bad u kubur ba ki samla ka Jylla ki donkam ruh ban tip shibun kiei kiei sawdong ka ri bad ka pyrthei ha kane ka pyrthei kaba jur ka jingïakob.
U la kubur ruh ba ki samla ki dei ban ïoh ïa ka tynrai jong ka jinghikai kaba biang ha ka por ba dang pule khamtam ban ïoh ka jinghikai kaba long lang ha ka ri baroh kawei khnang ba kin lah ban ïakob bad kham ïar ka jingtip jingnang.
U la ong ba ki don ruh ki samla kiba tbit kiba la pass ïa ka eksamin MCS bad long ki ophisar hapoh ka Sorkar Jylla.
Namar kata, u kyrmen skhem da ka jingdon shuh shuh ki jaka ai jinghikai bad jingminot bad jingkut jingmut ki samla, ka Jylla kan sa lah ban pynmih ïa ki samla kiba pass ïa ka eksamin UPSC ban ïoh long ki ophisar IAS, IPS bad kiwei kiwei ki kyrdan hapoh ka Sorkar Pdeng bad Sorkar Jylla kumjuh.
