Shillong, Ïaïong 23
Ki pulit ha ka Sngi Ba-ar ki la kem noh ïa 2 ngut ki briew halor ka jingsuba jur ba ki donkti ha ka jingthombor bad pynïap ïa ki nongbylla bar jylla ha Ichamati bad Dalda, bad Mawlai Mawroh.
Katkum ka tyllong khubor, la ong ba kitei kiba shah kem ki dei na ka thaiñ Mawlai bad uwei na Nongthymmai. La ong ruh ba jingkem jong ki pulit ïa kine ki briew ka dei halor ka jingjia kaba dang shen kaba la jia ha Ichamati bad ha Mawlai Mawroh.
La ong ba ïa uwei la kem halor ka jingsuba donkti ha ka jingpynïap ïa uwei u nongbylla bar jylla kaba la jia ha Mawlai Mawroh bad ïa uwei pat la kem halor ka jingjia ha Ichamati.
Lah ban pynkynmaw ba halor ka jingjia shah pynïap jong 2 ngut ki bar jylla ha Ichamati bad Dalda, ki pulit ha ka 2 tarik Ïaïong ki la kem ïa 2 ngut ki dkhot ka Khasi Students’ Union (KSU) halor ka jingkynnoh donkti ban pynïap ïa kitei ki bar jylla.
Kine ngut ki dkhot ka KSU kiba la shah kem ki dei kiba la tip kyrteng kum u Shanbor Shati (26 snem) na ka shnong Wah Utim bad u Meshadapbor Skhembill na Saitsohpen, Sohra.
Ka jingjia shah pynïap jong 2 ngut ki bar jylla ha Ichamati bad Dalda ka la long ha ka 27 tarik Lber. Ki bar jylla kiba la suba shah bom ïap ki dei ba la tip kyrteng kum u Esan Sing bad u Sujit Dutta, ha kaba ïa ka metïap jong ki la lap na Ichamati bad Dalda.
Ha kawei pat ka jingjia, kaba la jia ha ka 10 tarik Ïaïong, 2 ngut ki nongbylla bar jylla kiba trei ha kawei ka ïing ha Mawlai Mawroh ki la shah tied shah bom, ha kaba uwei u la khlad noh namar ka jingjur jong ka jingmynsaw bad une u dei ba la tip kyrteng kum u Arjun Ray, 52 snem ka rta.
