Shillong, Ïaïong, 23
Ha kawei ka jingjia shah leh be-ijot, kawei ka samla kaba 26 snem ka rta ha ka 20 tarik mynta u bnai ka la leit ban mudui da ka ejahar halor ka jingshah kynnoh leh be-ijot ha ki 4 ngut ki khynnah shynrang kiba la shu antad ba ki la don hapdeng 20 bad 21 snem ka rta.
Katkum ka ejahar ba la mudui da katei ka samla, ka la ïathuh ba katei ka jingjia ka la jia ha kawei ka jaka kaba don ha nongbah Shillong ha u Nailur, 2023 bad kitei ki samla shynrang kiba la leh ïa katei ka kam ha katei ka por, ki la ring da ka dur khih bad ïa kane ki la pynsaphriang ha ki rynsan lad pathai ‘Social Media’ hashuwa ka ilekshon Lok Sabha kaba dang shu dep long shen ha kine ki khyndiat sngi.
Katkum ka jingphla jong katei samla, ka la ïathuh ba ha kaba sdang ka ïa ithuh-ithaw bha tang bad uwei napdeng kitei ki 4 ngut lyngba ka jingïalehkai ‘Pub-G’. Ka dei ruh ha u Nailur, 2023 utei u paralok jong ka, u la khot sngewbha ïa ka sha ïing jong u ban wan dihsha step namarba ka dei ha ka por mynstep phyrngab bad kane ka samla da ka jingshaniah ïa u, ka la leit sha ïingsah jong u khlem da suba sniew eiei, phewse ka la jia pynban da khongpong.
Katei ka samla ka la ïathuh ba dei ha kum kane ka por ba ma u bad lai ngut ki paralok jong u ki la tyrwa ïa ka ban bam da u ‘Maggie’ hynrei ki la ong ïa ka ba kim ïoh ai sha namar ba ym don slasha shuh ha ïing.
Mar kumta ki la tyrwa ïa ka da ka umsoh ba kan dih bad dei ha katei ka por, kitei ki 4 ngut ki la khleh da u jingdih pynbuaid ha ka umsoh bad ki la ai dih ïa ka kat haduh ba kam tip briew shuh bad ïohthiah kumba ïap khlem sngewthuh shuh ïa kaei kaba la jia hadien kata ka jingïohthiah jong ka.
Katei ka samla ka la ïathuh ba dei ha katei ka khyllipmat ba kam tip briew shuh ba kitei ki 4 ngut ki la shim kabu bad kynnoh leh be-ijot ïa ka ha ryngkat ka jingring ïa ka dur khih ha ka por ba ki la leh ïa katei ka kam poh.
Ka la ïathuh ba ynda ka la khie naba thiah ha katei ka ïing jong utei u paralok jong ka, ka la lap ba ki jaiñ phong jong ka ki don ha ka met kumba ka wan bad kam shym la sngewthuh satia ïa ka jingsngewpher jong ka met ka phad hynrei ka la don jingsngew artatien bad ynda ka la kylli na utei u paralok jong ka, u la ong ba u khlem ktah eiei ïa ka hynrei ka la shu ïohthiah hi kumto.
Kaei kaba kham sngewsih ka long ba katei ka samla kam shym la tip eiei ba kitei ki 4 ngut ki lah dep ban leh be-ijot ryngkat ka jingring ïa ka dur khih ïa ka hynrei dei tad haduh ba kin da pynsaphriang ïa katei ka dur khih ha ki rynsan ‘Social Media’ mynta u bnai bad dei ha kane ka por ka la ïohi bad ïoh jingtip ba ki la leh ïa kane ka kam pohjait ha ka por ba ki la ai jingdih pynbuaid ïa ka.
Katei ka samla ka la pynpaw ka jingsngewsih halor katei ka jingjia da ka jingkyrpad ruh ba ka tnat pulit ba ka dei ban kem ïa kitei ki 4 ngut kiba la leh ïa katei ka kam khnang ba kum kitei ki jingjia kin ym wan jia shuh nangne shakhmat ïa kiwei pat ki para samla kynthei tang namar ha ka jingshaniah ïa ki paralok.
La ïathuh ba kat haduh ba la thoh ïa kane ka khubor, na ka liang ki pulit ki la ïoh ban kem ïa ki lai ngut kiba donkti ha kane ka kam bad mynta ki dang ïai thwet sa ïa uwei pat uba dang phetrieh.
