Shillong, Ïaïong 23
U MLA ka National People’s Party (NPP) uba dei ruh u Myntri Sorkar, u Rakkam A Sangma, u la ong ba ka seng ka khmih lynti ban jop na baroh ar tylli ki Lok Sabha konstitwensi na Shillong bad Tura ha kane ka ilekshon kaba dang shu dep thep ‘vote’ ha ka 19 tarik mynta u bnai.
Haba kren shaphang ka jinglong ka rukom ïakhun ilekshon mynta ka sngi na baroh ar tylli ki konstitwensi ha kaba ka NPP ka la ïakhun ha ka sien banyngkong na Shillong parliamentary konstitwensi, u Rakkam u la ong ba ha baroh ar tylli ki konstitwensi ka jingïakhun ka don bad u kyrmen ba ki kyrtong ka NPP ka Agatha K Sangma bad Kong Ampareen Lyngdoh kin poi sha ka thong namar ka don ka jingïakhun.
Haba kylli shaphang ka Tura, u Rakkam u la ong ba ka jingïakhun ka don bha hynrei ka NPP ka khmih ban jop biang ka Agatha wat lada ka don ka jingpynphai ‘vote’ na ka TMC sha ka Congress.
U kyrtong ka Congress na Tura u dei u MLA ka Gambegre, u Saleng A Sangma uba la ïoh bha ka jingkyrshan na ki paidbah ha kane ka kynti.
U la ong ba ka paw ba ka TMC ka la pyndem ïalade ha kane ka jingïakhun da kaba phah ïa ki nongkyrshan ban kyrshan sha ka Congress.
U kyrtong ka TMC na Tura u dei u Zenith Sangma.
Halor ka jingkyrshan ka BJP ïa ka NPP ha kane ka ilekshon, u Rakkam u la ong ba ha Rilum Garo, ka BJP ka ïoh kumba 90,000 hajar vote, bad lada ka long shisha kumba khmih lynti, ka long ka jingkyrkhu ïa ka NPP.
Hynrei u la ong ba ka jingpynrung ïa ka jingsngewniam, bad jingpyntieng ka long kaba sngewkhia haduh katta katta bad wat ki don ruh kiba rung ka jingsngew bad shah pynsngewthuh bakla.
Namar kata, u Rakkam u kyrmen skhem ba ka jingjop ka NPP ka long ka jingkieng ban pun hapdeng ka Sorkar Jylla bad ka Sorkar Pdeng bad wanrah ki kam pynroi kiba dang donkam byllai ha kane ka Jylla.
