Iran, ïaïong:
U nongialam ba ha khlieh duh jong ka Iran- u Ali Khamenei ha ka Sngi Nyngkong u la ïaroh ia ka jingshlur jong ka tnat iada ka ri jong u, kaba la nud bad shlur ban leit thombor ia ka Israel ha kane ka taiew ba la dep ban pynhiar kput ia ka jingleh jong ka Israel haba iadei bad ka jingduh noh ia ki heh jong katei ka ri kiba don ha ka tnat ‘Embassy’ kaba dei khmih ia ki nong Iran hapoh Syria.
Hynrei na ka liang ka Israel kam shym pynphai ktien eiei halor katei ka khubor.
Namar la ong ruh ba ha ka sien ba nyngkong, ka Iran ka la leit thombor haduh 300 tylli ki ‘namding bad ki drone jong ka sha Israel ha ka 13 tarik u Iaiong, ha kaba ka Iran ka la pynbna ba katei ka long ka jingkput haba iadei bad ka jingleit mushlia jong ka Israel ia ka tnat jong ka Iran kaba don hapoh Syria bad ba ka Iran ka la duh noh ia 3 ngut ki heh nong kit kam kiba don ha katei ka tnat namar katei ka kam thombor jong ka Israel ha katei ka bynta jong ka Syria ba katei ka tnat treikam na Iran ka don.
Hynrei ia kiba bun hi ki ‘namding bad ki drone la ioh siat pynbthei bad pynhap noh da ka Israel bad tang kumba katto-katne spah ki la ioh ban leit pynjulor sha Israel kumba la thmu da ka Iran.
Wat la katta, la ong ba kam pat ju mih ka jing-iakren ba haduh katto tylli ka Iran ka la phah ia ki ‘namding bad ki drone sha Israel ha katei ka miet bad haduh katto tylli ka Israel ka la lah ban tehlakam bad katno tylli ki la ioh ban leit pynjulor ia ka Israel.
Ha kawei ka jingjia ruh kaba dang shu jia shen ha ka Sngi Thohdieng jong kane ka taiew ba la lah, ka Iran ka la sakhi ia ka jingbthei kaba jur hapoh ka nongbah Isfahan jongka, ha kaba ki tyllong khubor na Iran ki kynnoh bad pharep beit ia ka Israel ba dei ma ka- kaba la leit ban thombor sa ia katei ka nongbah ha katei ka sngi.
Ha katei ka sngi kaba bud, ka Israel ka la pynbna ba ki shipai jongka ki la ioh ban tehlakam haduh da ki spah tylli ki ‘namding bad ki drone jong ka Iran kiba leit ban poi sha u pud- u sam ka Israel da ka jingthmu ban thombor ia ki paidbah nongshong shnong jong ka Israel bad ban buh jingma ruh ia ka ri Israel baroh kawei ha kane ka por.
Kumjuh ruh u Myntri Rangbahduh ka Israel- u Benjamin Netanyahu ha kine ki khyndiat sngi u la ong ba katei ka jingiakynad hapdeng jong ka Israel bad ka Iran kam shym kut noh tang kumne, hynrei ka Israel ka don da kiwei pat ki jingthmu bad kan nym ailad ia kiwei pat ki ri ba kin leit ban thombor ne ban buh jingma ia ka.
