Shillong, Ïaïong 23
U Myntri Rangbah ka Jylla, u Conrad K Sangma haba pynpaw ïa ka jingsngewsih halor ka jingjia shah thang im jong 3 ngut ki briew kaba la jia ha ka thaiñ Rongmil ha East Garo Hills, u la kyntu ïa ki nongshong shnong ka Meghalaya bad Assam ba kin kiar na ki kam ïakynad ne ïaleh ban pynhiar kput bad ban shim ïa ka aiñ ha kti.
Lah ban pynkynmaw ba ha ka 17 tarik mynta u bnai, lai ngut ki samla na Assam ki la shah thang im ha ka thaiñ Rongmil, East Garo Hills bad thang ruh ïa ka kali kaba ki la pyndonkam.
Haba pynrem jur ïa kane ka jingjia, u Myntri Rangbah u la ong ba ka jinglap ïa ki metïap ba la shah thang jong lai ngut ki nong Assam kiba la tep hajan ka kali kaba la shah thang, ka long kum ka jingpynkynmaw ïa ka jingleh dusmon kaba lah ban pynkhynñiuh ïa ka jingïadei hapdeng ki jaidbynriew.
U Conrad u la ong ruh ba kum kine ki kam, kim don jaka satia ha ka imlang-sahlang bad ka dei ka jingïuhroit kaba khraw tam.
“Nga kyrpad ïa uwei-pa-uwei, kata ïa ki nong Assam bad Meghalaya ba kin kiar na kino-kino ki kam ïakynad ne ban shim ïa ka aiñ ha la kti bad leh ïa kino-kino ki kam kiba long kum ka jingpynhiar kput,” la ong u Conrad.
Ha kawei pat ka liang, u Conrad u la pyntip ba ki bor sorkar ki la dep ban shimkhia halor kane da kaba thung ïa ka jingtohkit kaba bniah halor kane ka kam bad ai ruh ka jingkular ba ka jingïaleh ka long ban kem ïa kito kiba donkti ha kane ka kam.
Ha kajuh ka por, u Myntri Rangbah u la phah ruh ïa ka kyrwoh sngewlem sha ki bahaïing jong ki longïing kiba la ngat ha katei ka apot.
