Shillong, Ïaïong 23
Wat la ki la shah pynhiar kyrdan na ka lympung ïalehkai I-League, u Myntri Rangbah ka Manipur u la buh ka jingkyrpad ïa ka All India Football Federation na ka bynta ban pyllait na ka jingshah pynhiar kyrdan ïa ki ar tylli ki klob na ka daw ka jingbym don ka shong suk shongsaiñ ha katei ka jylla.
Kat kum ka shithi ba la phah ha ka 8 tarik u Lber 2024 sha ka AIFF president u Kalyan Chaubey, la ong ba u Myntri Rangbah ka Manipur u N. Biren Singh u la buh ka jingkyrpad na ka bynta ban dang ïai pynneh ïa ka TRAU FC bad ka NEROCA FC ha ka lympung ïalehkai I-League First Division.
“Nga sngew ban ong ba baroh ar tylli ki klob ki la mad ïa ka jingeh halor ka jingjia kaba la jia ha Manipur. Ngan da sngewkmen eh ba phin dangïai pynneh ïa ka TRAU FC bad ka NEROCA FC ha ka kyrdan ïalehkai First Division jong ka I-League,” la thoh u Myntri Rangbah ka Manipur.
“Ka aïom ba la lah ka la long ka jingeh kaba khraw namar ka jingjia ha Manipur ia kaba la sdang naduh 3 tarik u Jymmang jong u snem 2023. Na ka daw ka jingbym shongshngaiñ, ki jingïalehkai ha la ïing kiba la buh jingeh ïa ka TRAU FC bad ka NEROCA FC namar kim ïoh ka jingkyrshan na ki paidbah bad kiba bun ki longïing jong ki rangïalehkai ki la ngat ha ki jingshah thombor bad kane ka la ktah ïa ka pyrkhat pyrdaiñ jong ki rangïalehkai,” la bynrap kat kum katei ka shithi.
Ha kawei pat ka liang, ka AIFF ka la ong ba ka League Committee kan sa ïamir jingmut lang bad ka Executive Committee halor kane ka bynta.
Shuh shuh ha katei ka shithi ba la thoh da u Biren Singh u la ong ba kitei ki klob kiba na Manipur ki la buh ruh ka jingkyrpad na ka AIFF ba kan pynïalehkai ha kawei ka jaka kaba long laitluid pyrshah ïa ka Aizawl FC namar kam long kaba shngaiñ ban ïalehkai ha Mizoram bad ki lah ban shah thombor ha ki jaitbynriew Kuki.”
Na ka daw ka jingkyntait da ka Aizawl, na ka liang ka AIFF ka la rai ban pynsangeh noh ïa kitei ki jingïalehkai bad ki la shu pynïasam mar shi point.
