Shillong, Ïaïong:
U Working President ka Khun Hynñiewtrep National Awakening Movement (KHNAM), Bah Thomas Passah, u la pynrem jur ïa ka jingjia pynibor jong ki briew kiba shong ba sah hapoh ka Them Ïew Mawlong kaba la jia ha ka miet jong ka Sngi Saitjaiñ ka 20 tarik u Ïaïong ha kaba kitei ki kharmetor ki la sdang pynmih huri-hura ha ka dukan dih bad bam kaba la tip kum ka Saw Aïom Restaurant kaba don ha Them Ïewduh hajan ka basa sohsaw.
Kum ban shu kdew hangne ka jingkulmar ka la sdang na ka daw ka jingleh baheh jong katto-katne ki kharmetor kiba don kumba 4-5 ngut eiei kiba la leit ban dih ban bam hapoh ka Saw Aïom Restaurant ha kaba kitei ki briew ki la pyneh ban siew ïa ka bai bam bad ka bai dih jong ki kaba la poi pat shaduh u pud ka jingïakynroi hapdeng ki nongtrei katei ka dukan bad ba kitei ki kharmetor. Ïa kane la sakhi ruh lyngba ki dur khih ba la saphriang kitei ki kharmetor kiba la mih da ka kynhun kaba don haduh kumba 30-50 ngut eiei da ka jingthmu ban thaw jingkulmar ha katei ka thaiñ.
Halor kane, na ka liang u Bah Thomas u la ong ba kine ki jingjia ki la jia namar ka jingpynslem jong ka sorkar ban weng noh ïa kitei ki kharmetor kiba shong ba sah ha Them Ïewmawlong. Da kane ka jingpynslem ban weng ïa kitei ki briew kan wanrah ka jingma kaba khraw bha lada ym pynkynriah noh shisyndon ïa ki na katei ka jaka.
“Ha ki bnai ba la dep, ki pulit ki la ïoh kem ruh ïa kawei ka briew ha ryngkat u drok, kane ka pynshisha ba kane ka jaka ka la kylla long ka ktem jong ki jingsniew na ka jingdon jong kine ki briew ha katei ka jaka”, la ong u Bah Thomas.
U la ong ba khlem pep na ka jingdon jong kine ki briew ha katei ka jaka kan buh ruh ha ka jingma ïa ka mynsiem jong ki trai ri trai muluk kiba ïaid ba ïeng lyngba katei ka jaka bad u la ong ba kadei ka kamram jong ka sorkar ban leh eiei hashwa ban wan ne mih kano-kano ka jingmynsaw hadien habud.
“Lada ka sorkar ka la shu leh kyllut leh matlah wat hadien kine ki jingjia, kan hap hi ban shim ïa ka jingkitkhlieh. Kumba ngi la ïai dawa naduh ba sdang, ngi kwah ban ban biang sa shisien ba ka sorkar kadei ban weng noh khlem pynslem shuh ïa kine ki briew na katei ka jaka”, la ong u Bah Thomas.
